Ayni paytda O‘FA majlislar zalida O‘zbekiston milliy jamoasi bosh murabbiyi Fabio Kannavaro ishtirokida matbuot anjumani bo‘lib o‘tmoqda.
Italiyalik mutaxassis Jahon chempionatidan keyin milliy jamoani tark etib, dam olish uchun Italiyaga ketgani haqidagi xabarlarni rad etdi.
«Jahon chempionatidan keyin darhol Italiyaga dam olish uchun ketdi, degan gaplar haqiqatga to‘g‘ri kelmaydi. Men mundial yakuniga qadar Nyu-Yorkdagi mehmonxonada milliy jamoa bilan birga bo‘ldim.
Superligada tanaffus bo‘lgani uchun uyimga borib keldim. Chempionat qayta boshlanganidan keyin esa O‘zbekistonga qaytdim va o‘yinlarni muntazam kuzatib boryapman», — dedi Kannavaro.
Shuningdek, murabbiy milliy jamoaning asosiy kamchiligi haqida ham to‘xtalib o‘tdi.
«8–9 oy oldin ham mavjud muammolar va futbolchilarimiz darajasi haqida gapirgandim. Biz doimo intensivlik masalasiga e’tibor qaratdik. Futbolchilar yuqori tempda o‘ynashi kerakligini ta’kidlab kelganman.
Jahon chempionatida o‘yin sur’ati juda yuqori bo‘lishini oldindan bilardim. Balki ko‘pchilik mundialda qiynalmaymiz deb o‘ylagandir, ammo men bu haqda avvaldan ogohlantirgandim», — deya qo‘shimcha qildi mutaxassis.
Muxlislar bu yangilikni Telegram’da muhokama qilmoqda
Izohlar Telegram’da ochiladi