Ferran Torresning «PSJ»ga transferi «Barselona»ning transfer bozoridagi moliyaviy imkoniyatlarini sezilarli darajada kengaytirdi. Bu haqda Diario Sport xabar berdi.
Kataloniya klubi 26 yoshli hujumchini qariyb 50 million yevroga sotdi. Ushbu transfer «Barselona» tarixidagi eng qimmat sotuvlar reytingida beshinchi o‘ringa chiqdi.
«Barselona» Torresni 2022 yil yanvarida 55 million yevroga xarid qilgan va futbolchi bilan 2027 yil yozigacha shartnoma imzolagan. Uning yillik amortizatsiyasi 10 million yevroni tashkil etgan. Shu sababli transfer amalga oshirilgan paytda klub hisobotida futbolchining qolgan qiymati ham 10 million yevro edi.
Natijada «Barselona» transferdan qariyb 40 million yevro sof foyda oldi. Bundan tashqari, klub Torresning shartnomasining so‘nggi yilidagi maoshidan taxminan 10 million yevro tejaydi. Umuman olganda, hujumchining ketishi moliyaviy feyr-pley doirasida «Barselona» uchun 50 million yevrolik imkoniyatni bo‘shatdi.
Manba hisob-kitobiga ko‘ra, «Manchester Siti»dan Rodrini 70 million yevroga xarid qilib, u bilan 4 yillik shartnoma tuzilsa, futbolchini ro‘yxatdan o‘tkazish uchun «Barselona»ga taxminan 37,5 million yevro kerak bo‘ladi. Karim Adeyemini ro‘yxatdan o‘tkazish esa yana qariyb 16,4 million yevroga tushadi.
Shunday qilib, ikki futbolchi bo‘yicha umumiy moliyaviy yuklama 53,9 million yevroga baholanmoqda. Torresning sotilishi esa bu summaning deyarli barchasini qoplaydi.
