Ферран Торреснинг «ПСЖ»га трансфери «Барселона»нинг трансфер бозоридаги молиявий имкониятларини сезиларли даражада кенгайтирди. Бу ҳақда Diario Sport хабар берди.
Каталония клуби 26 ёшли ҳужумчини қарийб 50 миллион еврога сотди. Ушбу трансфер «Барселона» тарихидаги энг қиммат сотувлар рейтингида бешинчи ўринга чиқди.
«Барселона» Торресни 2022 йил январида 55 миллион еврога харид қилган ва футболчи билан 2027 йил ёзигача шартнома имзолаган. Унинг йиллик амортизацияси 10 миллион еврони ташкил этган. Шу сабабли трансфер амалга оширилган пайтда клуб ҳисоботида футболчининг қолган қиймати ҳам 10 миллион евро эди.
Натижада «Барселона» трансфердан қарийб 40 миллион евро соф фойда олди. Бундан ташқари, клуб Торреснинг шартномасининг сўнгги йилидаги маошидан тахминан 10 миллион евро тежайди. Умуман олганда, ҳужумчининг кетиши молиявий фейр-плей доирасида «Барселона» учун 50 миллион евролик имкониятни бўшатди.
Манба ҳисоб-китобига кўра, «Манчестер Сити»дан Родрини 70 миллион еврога харид қилиб, у билан 4 йиллик шартнома тузилса, футболчини рўйхатдан ўтказиш учун «Барселона»га тахминан 37,5 миллион евро керак бўлади. Карим Адейемини рўйхатдан ўтказиш эса яна қарийб 16,4 миллион еврога тушади.
Шундай қилиб, икки футболчи бўйича умумий молиявий юклама 53,9 миллион еврога баҳоланмоқда. Торреснинг сотилиши эса бу сумманинг деярли барчасини қоплайди.
