Elit Osiyo Chempionlar Ligasi musobaqasining 4-turidan o‘rin olgan «Traktor» — «Neftchi» uchrashuvi rasmiylari ma’lum bo‘ldi. Osiyo futbol konfederatsiyasi ushbu bahsga janubiy koreyalik hakamlar guruhini tayinladi.
Uchrashuv 2 noyabr kuni Ummon poytaxti Maskatdagi «Sulton Qobus» sport majmuasida o‘tkaziladi. Bosh hakam vazifasini Choy Hyon Jay bajaradi. Yordamchi hakamlar Jang Jun Pil va Chon Jin Xi bo‘ladi. Zaxira hakami etib janubiy koreyalik Chxe San Xyop belgilandi.
Video yordamchi hakam (VAR) sifatida Kim Usung ish olib boradi, unga Choy Chxol Jun yordam beradi. Shu tariqa, maydondagi hakamlar hamda video yordamchi hakamlar brigadasining barcha a’zolari Janubiy Koreyadan bo‘ladi.
Qayd etish lozim, ayni vaqtda farg‘onaliklar musobaqada 3 ochko jamg‘argan holda 9-o‘rinni band etib turibdi. Jamoa 3-turda Saudiya Arabistonining «Al Ittihod» klubiga mag‘lub bo‘lgandi.
Muxlislar bu yangilikni Telegram’da muhokama qilmoqda
Izohlar Telegram’da ochiladi