«Bavariya» sport direktori Maks Eberl Joau Palinya bo‘yicha muzokaralar davom etayotganini tasdiqladi. Futbolchi «Leypsig»ga qarshi o‘rtoqlik uchrashuvida maydonga tushmadi.
«Muzokaralar ketmoqda, transfer amalga oshishi mumkin. Shu sababli tavakkal qilishni istamadik», — dedi Eberl Goal.com'ga.
«Aston Villa» bilan muzokaralar muvaffaqiyatsiz yakunlanganidan so‘ng, Palinyaning keyingi manzili sifatida «Nyukasl» ko‘rilmoqda. Klub Bruno Gimarayesh ketganidan keyin yarimhimoyachi izlamoqda.
Palinya 2024 yil yozida «Fulhem»dan «Bavariya»ga 50 million yevroga o‘tgan, biroq Myunxen klubida kutilgan darajada o‘yin ko‘rsata olmadi. O‘tgan mavsumni u «Tottenhem»da ijara asosida o‘tkazdi, ammo London klubi futbolchini sotib olishga qaror qilmadi.
Avval «Bavariya» Palinyani faqat taxminan 25 million yevroga to‘liq transfer qilishni ko‘rib chiqqan bo‘lsa, endi klub uning ijarasiga ham tayyor.
Eberl o‘ng qanot himoyachisi Sasha Boe bo‘yicha ham futbolchining jamoada qolishi maqsadga muvofiq emasligini aytdi.
«Sashaning sifati bor, bunga shubha yo‘q. Ammo hozir o‘ng qanotda odatda Stanisich va Laymer o‘ynaydi. Uni jamoada qoldirish moliyaviy va sport nuqtayi nazaridan noto‘g‘ri bo‘lardi», — dedi Eberl.
«Bavariya» Palinya, Boe va jarohatlangan Brayan Saragosaga yangi mavsumda jamoada muhim rol o‘ynamasliklari haqida allaqachon ma’lum qilgan. Boe o‘tgan mavsumning ikkinchi qismini «Galatasaroy»da, Saragosa esa «Roma»da ijara asosida o‘tkazgan.
