«Barselona» «Manchester Siti» yarim himoyachisi Rodri uchun yuborgan dastlabki taklifi rad etilganidan so'ng, yangi taklif tayyorlamoqda. Bu haqda jurnalist Ben Jeykobs xabar berdi.
Manba ma'lumotiga ko'ra, kataloniyaliklar 30 yoshli ispaniyalik yarim himoyachi uchun taxminan 45 mln yevro taklif qilgan. Biroq «Manchester Siti» bu summani yetarli deb hisoblamagan va futbolchi uchun kamida 75 mln yevro talab qilmoqda.
Shu bilan birga, «Barselona» transferni amalga oshirish bo'yicha optimizmni saqlab qolmoqda. Xabar qilinishicha, klub yaqin vaqt ichida yaxshilangan taklif bilan chiqadi. Rodri esa shaxsiy shartnoma shartlari bo'yicha kataloniyaliklar bilan kelishuvga erishgan.
Ayni paytda Ispaniya matbuotida Rodrining «Real»ga o'tish varianti deyarli kun tartibidan chiqqanini yozmoqda. Marca nashrining xabar berishicha, madridliklar hech qachon «Manchester Siti»ga rasmiy taklif yubormagan. Klub futbolchining vakillari bilan muzokara o'tkazgan bo'lsa-da, Rodri «Barselona»ning o'yin uslubi va jamoa muhiti o'ziga ko'proq mos keladi, deb hisoblagan.
Shu bois «Real» rahbariyati bu transfer amalga oshmaganini fojia sifatida qabul qilmayapti. Nashrning ta'kidlashicha, klub tarkibni deyarli shakllantirib bo'lgan va faqat favqulodda vaziyatdagina transfer bozorida yana faollashishi mumkin.
Hozircha Rodrining kelajagi bo'yicha hech qanday rasmiy kelishuv e'lon qilinmagan. Biroq so'nggi xabarlarga ko'ra, «Barselona» muzokaralarni davom ettirish niyatida va yozgi transferlar darchasi yopilguniga qadar ispaniyalik yarim himoyachini o'z safiga qo'shishga umid qilmoqda.
Muxlislar bu yangilikni Telegram’da muhokama qilmoqda
Izohlar Telegram’da ochiladi