«Barselona» va «Atletiko» hujumchi Xulian Alvares transferi bo‘yicha muzokaralarni 2026 yilgi jahon chempionati tugaguniga qadar kechiktirishga kelishib oldi. Bu haqda Diario Sport xabar berdi.
Turnir yakunlanganidan so‘ng Kataloniya klubi muzokaralarning faol bosqichini qayta boshlash va bitimni rasmiylashtirishni rejalashtirmoqda.
Alvaresning o‘zi ham ehtimoliy transferga tayyorligini ochiqchasiga namoyon qilib, birinchi qadamni tashlagan.
Muzokaralarni kechiktirishga faqat jahon chempionati sabab emas. «Barselona»da yaxshi tushunishmoqdaki, «Atletiko» jamoaning asosiy futbolchilaridan birini munosib o‘rinbosar topmasdan turib qo‘yib yuborishi qiyin.
Shu sababli kataloniyaliklar madridliklarga yaqin haftalarda transfer bozorida ishlash uchun vaqt berishga qaror qildi. O‘z navbatida, «Barselona»ning moliyaviy rejasi ham o‘zgarmagan. Qayd etilishicha, jahon chempionati tugagach, klub taxminan 100 million yevro miqdorida taklif yubormoqchi.
«Ko‘k-anorranglilar» rahbariyati ushbu summa klub imkoniyatlari doirasidagi eng yuqori taklif ekaniga ishonishmoqda. Shuningdek, ular bu mablag‘ futbolchining bozor qiymati va «Atletiko»ning moliyaviy ehtiyojlariga mos keladi deb hisoblamoqda.
Kataloniya klubi taklifni 150 million yevrogacha oshirish niyatida emas.
Muxlislar bu yangilikni Telegram’da muhokama qilmoqda
Izohlar Telegram’da ochiladi