«Barsa» — klasikodagi mag‘lubiyatga qaramay, La Liga g‘olibligi uchun yaqqol favorit (Opta)

«Real»ning «Barselona» ustidan «El Klasiko»dagi 2:1 hisobidagi g‘alabasi La Ligadagi chempionlik uchun kurashdagi vaziyatga ta’sir ko‘rsatmadi, deb hisoblamoqda Opta.

Superkompyuter prognozlariga ko‘ra, kataloniyaliklar chempionlik uchun kurashda hamon yaqqol favorit bo‘lib qolmoqda. Flik jamoasining chempion bo‘lish ehtimoli 66,7 foizga baholanmoqda.

Opta reytingida «Real» ikkinchi o‘rinda. Madridliklarning chempionlikni qo‘lga kiritish ehtimoli 24,2 foizni tashkil etmoqda. Keyingi o‘rinlarda «Atletiko» (8,4%) va «Betis» (0,6%) joylashgan. Qolgan jamoalarning chempion bo‘lish ehtimoli 0,1 foizdan kam.

La Liga turnir jadvalida «Barselona» 27 ochko bilan peshqadamlik qilmoqda. «Atletiko» kataloniyaliklardan 2 ochko, «Real» esa 3 ochko ortda qolmoqda.