«Челси» италиялик мутахассис Энцо Маресканинг жамоани тарк этиши юзасидан расмий баёнот эълон қилди.
Таъкидланишича, клуб Марескани «шаҳарликлар»да иш бошланишини аввалдан билган.
«Биз унинг айнан шу ишни олишни қаттиқ хоҳлаётганини ва узоқ муддатли шартномага эга бўлишига қарамай, бутун эътиборини шу имкониятга қаратганини тушундик.
2025 йил декабр ойида бош мураббий кутилмаганда истеъфога чиқди. Табиийки, биз ўзимизни алдангандек ҳис қилдик. Чунки унинг хаёли ва қалби аллақачон бошқа клуб ва бошқа имконият билан банд эди, ҳолбуки у бор-йўғи бир йил аввал «Челси»га келганди», — дейилади баёнотда.
Лондон клуби мавсум ўртасида бош мураббийни алмаштиришни истамаганини, аммо Мареска мавсум охиригача ўз вазифасини бажаришни рад этгани учун унинг истеъфосини қабул қилишдан бошқа чора қолмаганини билдирди.
Шунингдек, «Челси» ва «Манчестер Сити» ўртасида махфий келишувга эришилгани маълум қилинди. Унга кўра, Манчестер клуби компенсация тўлайди. Энцо Маресканинг ўзи ҳам алоҳида келишув асосида «Челси»га товон пули тўлайди.
