Зинедин Зидан бош мураббийлигидаги Франция миллий жамоасининг ўз уйидаги илк ўйини учун барча чипталар тўлиқ сотиб бўлинган. Бу ҳақда RMC Sport хабар берди.
Францияликлар 2 октябр куни Миллатлар Лигаси доирасида Италияни ўз майдонида қабул қилади. Қайд этилишича, «Стад де Франс»даги ўйин учун барча 80 мингта чипта очиқ савдога чиқарилганидан кейин тахминан бир сутка ичида сотиб бўлинган.
Чипталарнинг кенг омма учун савдоси 31 июл куни соат 14:00 да бошланган. Франция мухлислари ассоциацияси Bleus & Fiers президенти Жан-Батист Монтарниенинг сўзларига кўра, Италияга қарши ўйинга бўлган талаб одатдагидан тахминан уч баробар юқори бўлган.
«Албатта, Зидан эффекти бор. Одамлар стадионга келиб, Франция футболи афсонаси бўлган янги мураббийни кўришни исташмоқда», — деди Монтарние.
Маълумот ўрнида, Зидан 28 июл куни Дидие Дешам ўрнига Франция миллий жамоаси бош мураббийи этиб тайинланган. Унинг қўл остидаги илк учрашувни жамоа 25 сентябр куни сафарда Туркияга қарши ўтказади. Шундан сўнг францияликлар сафарда Белгия билан ўйнайди, кейин эса Италия ва яна белгияликларни «Стад де Франс»да қабул қилади.
