«Ливерпул» ва Англия миллий жамоаси собиқ яримҳимоячиси Стивен Жеррард клуб тарихидаги энг буюк футболчи деб эътироф этилди. Бу ҳақда жамоа расмий сайти хабар берди.
134 йиллик тарих давомидаги статистика таҳлил қилиниб, мухлисларнинг 1,35 миллиондан ортиқ овози ҳамда «Ливерпул» афсоналарининг фикрлари инобатга олинган ҳолда Стивен Жеррард клуб тарихидаги энг буюк футболчи сифатида танланди.
Рейтинг футболчиларнинг маҳорати, ўйинга кўрсатган таъсири, клубда қолдирган мероси ва «Энфилд»даги фаолияти давомидаги ютуқлари асосида шакллантирилди.
Маълумот ўрнида, Жеррард 2015 йил май ойида футболчи сифатида «Ливерпул» билан хайрлашган. У клуб сафида 186 та гол урган ва жамоа тарихида 700 тадан ортиқ ўйин ўтказган атиги 3 нафар футболчидан бири ҳисобланади.
