Венгер: «Олтин тўп» ютган 6 францияликдан 5 нафари келиб-чиқиши бошқа миллатга бориб тақалади»

«Арсенал»нинг собиқ бош мураббийи Арсен Венгер Франция футболининг муваффақияти сабаблари ҳақида ўз фикрини билдирди.

«Менимча, бизнинг муваффақиятимиз сифатли таълим, кўплаб мамлакатларда етарлича эътибор берилмайдиган иқтидорларни аниқлаш тизими ва Африкадан келган муҳожирлар билан боғлиқ.

Франция футболи тарихига назар ташласангиз, унинг ривожланиши муҳожирлик тарихи билан чамбарчас боғлиқ.

Франциянинг илк «Олтин тўп» соҳиби Раймон Копа келиб чиқишига кўра поляк эди.

Мишел Платини — италиялик, Зинедин Зидан эса келиб-чиқишига кўра жазоирлик эди.

Жан-Пиер Папен муҳожир эмасди. Аммо кейинги «Олтин тўп» эгалари Карим Бензема Жазоирга, Усмон Дембеле эса африкаликларга бориб тақалади.

Улар Францияга келишади, чунки бу ерда ҳақиқий таълим ва ривожланиш имкониятлари борлигини ҳис қилишади. Кўпинча улар катта иштиёқ билан ҳаракат қилишади, чунки энг яхшилардан бири бўлиш учун қаттиқ курашиш кераклигини яхши билишади», — деди Арсен Венгер Тони ва Феликс Крооснинг подкастида.