«Навбаҳор» клуби Ўзбекистон Кубоги 1\8 финал босқичида Наманганда «Насаф»ни қабул қилди. Яқинда чемпионат доирасида бўлгани каби бу сафар ҳам Кападзе шогирдлари 1:0 ҳисобида ғалаба қозонишди. Бу галги ғалабадан кейин улар Кубокнинг чорак финалига йўл олишди. Учрашувдан сўнг наманганликлар устози Темур Кападзе матбуот анжуманида саволларга жавоб қайтарди.
- Ассалому алайкум. Табриклайман, ғалаба билан. Қийин учрашув бўлди, албатта. Биринчи навбатда барчани Мустақиллик байрами билан табриклайман. Юртимиз тинч бўлсин, осмонимиз мусаффо бўлсин. Фақат ривожланайлик, фақат кучаяйлик. Шунинг учун ҳаммани табриклайман ва ўйлайманки, чиройли ғалаба билан келган мухлисларга байрамга совға бўлди. Ўйинга келадиган бўлсак, албатта, қийин учрашув кутаётган эдик. «Насаф» яхши жамоа ва кетма-кет ўйнаш ҳар бир жамоа билан қийин. Ҳамма нарсани инобатга олган ҳолда, албатта, «Насаф» чемпионатда пастроқда юргани сабабли Кубокни улар ютиш учун охирги имконият эди. Шу боисдан учрашувга тайёргарлик кўрдик. Албатта, уларда ҳам, бизда ҳам вақт кам бўлди. Лекин бугунги ўйин даражаси сезилди, кўринди. Ҳаяжон ҳам, ҳамма нарса ҳам бўлди, чунки ҳар бир кичик хато ҳам қимматга тушиши мумкин эди. Шунинг учун балки хатолар кўп бўлгандир, қаердадир ўйин чиқмагандир. Лекин чидадик, кутдик, ҳаракат қилдик ва Худога шукр, охирида нуқтани қўйдик.
- «Навбаҳор» энди кейинги босқичга чиқди. Кучли жамоалардан «Пахтакор» чиқиб кетди. Энди нисбатан енгилроқ нафас олиш мумкин бўладигандек. Кейинги босқични шахмат тахтасига қиёсласак, қайси мураббий билан баҳслашишни хоҳлардингиз?
- Энди бу насиб. Бир нарсани олдиндан айтиш қийин. Ўзи бугунги учрашув, менимча, ярим финалга тенг бўлди. Чунки чемпионатдаги иккита кучли, курашадиган жамоа тўқнашди. Ўйиннинг даражаси ҳам сезилди. Албатта, «Пахтакор» ҳам, «Насаф» ҳам бу босқичда кетгани, балки қандайдир маънода биз учун ёқимли тарафидир. Чунки кейинчалик, ярим финал бўладими, финал бўладими, барибир иккита кучли жамоа йўқ. Лекин бу Кубок. Шунинг учун ҳар бир жамоа курашади, деб ўйлайман. Биз ҳам худди шундай, олдимизга қайси рақиб чиқишидан қатъий назар, максимал даражада тайёргарлик кўриб, ютишга ҳаракат қиламиз. Чунки кўриб турибсизлар, осон жамоа йўқ. Ҳар бир жамоа келиб, сафарда ёки уйда бўлсин, ғалаба учун майдонга чиқади. Биз ҳам яхши тайёргарлик кўриб, ҳаракат қиламиз. Болалар бугун ҳам ва ҳар бир ўйинда максимал ҳаракат қилишяпти. Борини бериб, жамоа учун ҳаракат қилишяпти. Шунинг учун ғалаба ҳам ўз-ўзига яраша татиб кўриляпти. Ишлаймиз, давом этамиз. Энди қуръа ташлашда ким чиқса, максимал тайёргарлик кўриб, ютишга ҳаракат қиламиз. Ким чиқишидан қатъий назар, кейинги босқичга ўтиш учун ҳаракат қиламиз.
- Темур ака, Наманган вилояти ҳокими, клуб раҳбари сизларнинг олдингизга қандай вазифа қўйган? Аниқ, мана шунга эришиш керак, деган мақсад борми ёки йўқми?
- Йўқ, ундай тўғридан-тўғри қандайдир вазифа қўйилмаган. Бошида гаплашганда, ўзим ҳам иккиландим: келайми, келмайми ва ҳоказо. Албатта, раҳбарият билан гаплашиб, эскитдан биламиз, қандай мухлислик муҳити борлигини. Шунинг учун биринчи навбатда шу ердаги мухлисларни хурсанд қилиш учун келдим. Албатта, ҳар бир ўйинда шундай мухлисларимизни хурсанд қилаётганимдан ўзимни жуда бахтли ҳис қиляпман. Чунки бу жуда зўр нарса — битта мухлисни бўлса ҳам хурсанд қилиш. Барибир раҳбаримиз ҳам, мен ҳам, биласизлар, максималистмиз ва ҳар бир ўйинда максимал даражада ғалаба учун курашамиз. Катта раҳбариятимиз бор. Шунинг учун ҳозир ҳам, насиб бўлса, ҳамма нарсани ўз ўйинларимизда ҳал қилишга, максимал даражада ютишга ҳаракат қиламиз. Қолгани насиб. Албатта, насиб. Лекин Кубокда ҳам, чемпионатда ҳам, Аллоҳга шукр, юқори ўринларга кўтарилиб, ютишга ҳаракат қиламиз. Ўйлайманки, вилоят ҳокими ҳам, мен ҳам ютқазишни ёмон кўрамиз. Лекин бошиданоқ «чемпион бўламиз», деб айтиш қийин. Чунки биз реал қарашимиз керак. Янги жамоа тузиляпти. Бошида, албатта, кўп очко йўқотдик. Ўзига яраша, уйда ўйнамаганимиз ҳам қаттиқ таъсир қилган бўлиши мумкин. Чунки биринчи даврада кўп очко йўқотдик, кераксиз очколардан айрилдик. Ҳозир айнан ўша олишимиз керак бўлган ўйинларни олганимизда, турнир жадвалидаги вазият бутунлай бошқача бўлиши мумкин эди. Лекин ўйлайманки, курашса бўлади. Курашамиз, охиригача курашамиз. Йил охирида ўзимизга тегишлисини олишимиз керак. Насиб, қаергача ўта олсак, шунгача борамиз. Албатта, мухлислар ҳам, раҳбарият ҳам бизларни тўғри тушунишади, деб ўйлайман. Ҳозирги вазиятимизни, умуман, жамоа қандай тузилаётганини адекват баҳолаяпмиз. Худога шукр, таркибимиз яхши. Ҳар бир чизиқда яхши, бир-бирига муносиб ва курашадиган жамоа. Албатта, чемпионликка даъво борлигини ҳам биламиз, ҳамма нарсани тушуняпмиз. Лекин биз ҳар бир ўйинда ўзимиз учун курашамиз. Майдонга максимал чиқиб, ўйинимизни кўрсатиб, ғалаба қозонсак, қолганини кейин кўрамиз — манзилимиз қаергача боради.
- «Иштаҳа овқат пайтида келади», деган гап бор. Бу йил чемпионликка ҳам, Кубокка ҳам «Навбаҳор» жамоасининг имкониятлари бор. Кейинги йилга «Навбаҳор» жамоасини Осиё Чемпионлар Лигасида кўрсак, деймиз. Ҳозирдан кўз олдингизга келтириб қўйганмисиз? Яъни, жамоани кучайтириш, профессионал даражани ошириш бўйича ҳозирдан қандайдир ғоялар борми? Келгуси йилда «Навбаҳор»нинг Чемпионлар Лигасида қатнашиши ҳақида нима дейсиз?
- Биринчи навбатда, насиб қилсин. Албатта, бу йил соврин ютиш насиб қилсин. Кейинги йил Чемпионлар Лигасида «Навбаҳор»... Чунки мухлислари фаол, бундай ўйинларни кўришни исташади. Барибир ҳар бир жамоа билан ўйнаганда, футболчиларни ҳам кузатамиз, қараймиз, таҳлил қиламиз. Деярли ҳар бир ўйинчини таниймиз. Албатта, қизиқамиз: шартномаси қачон тугайди, нима бўлади ва ҳоказо. Ўйлайманки, керакли футболчилар албатта кучайтириш учун жалб қилинади. Бироқ ҳозир келаси йилги ўйинларни ўйлашга эрта. Ҳозир бирор нарса дейиш ҳам қийин. Биз ҳали ҳеч нарса қилмадик. Биз фақат олдимизда турган рақибни ютдик ва давом этяпмиз. Уч кундан кейин яна битта рақиб бор, ундан кейин яна ўйин. Шунинг учун биз эйфорияга ёки бошқа нарсага берилиб кетмаслигимиз керак. Албатта, Худога шукр, ютдик, мухлисларни хурсанд қилдик. Лекин биз ҳали ҳеч нарса қилмадик. Йил охирида, насиб бўлса, шу кетишда, агар сизлар айтгандек, Кубокни ҳам, чемпионликни ҳам қўлга киритсак, жуда зўр бўлади. Чунки «Навбаҳор» чемпион бўлганига 30 йил бўлди. Бу ҳам битта тарихий натижа бўлади. Биз ҳамма нарсага реал қараган ҳолда ишимизга профессионал ёндашиб, болалар билан ҳар бир ўйинга максимал даражада чиқиб ҳаракат қиляпмиз. Лекин, албатта, кейинги йилгача ҳали вақтимиз бор — ўйлаш учун ҳам, ҳамма нарса учун ҳам.
- «Навбаҳор» кам гол ўтказаётган бўлса ҳам, масалан, охирги ўйинларда тўққизта аниқ зарбадан тўртта гол ўтказиб юборган. Бу хавотирга солмаяптими? Яъни, ҳар икки аниқ зарбадан биттаси гол бўляпти. Бу дарвозабон ва ҳимоячилар ўртасида коммуникация йўқлиги билан боғлиқ муаммо эмасми?
- Йўқ, муаммо ҳар доим бўлади. Камчиликлар бугун ҳам, ҳар бир ўйинда чиқади. Унинг устида ишлаяпмиз, ўйиндан-ўйинга кучайяпмиз. Деярли гол ўтказмайдиган жамоа бўлиш учун ҳам вақт керак. Чунки янги жамоа тузилганда, улар бир-бирини тушуниши учун, ҳатто оддий бир-бирига ишониши учун ҳам вақт керак бўлади. Ишхонага янги ишчи келса, ишлаши мумкин, лекин барибир қанчалик яқинлашишингиз вақт билан бўлади. Вақт ўтиши билан жамоа битта жамоага айланяпти. Бир-бирига муносабат ҳам, ёрдам бериш тарафдан ҳам, майдонда ҳам бу сезиляпти. Балки биринчи даврада бу сезилмаган эди. Барибир деярли 90 фоиз янги жамоа жамланганидан кейин унга озгина вақт керак. Биз учун ҳам худди шундай. Ҳар бир ўйинда уни қўясиз, буни қўясиз, имкониятларини кўрасиз, тўғрилашга ҳаракат қиласиз — назарияда бўлсин, машғулотда бўлсин. Кейин яна қарайсиз: ўша хато борми-йўқми. Хато чиқаверади. Унинг устида қандай ишлаб, тўғрилаш эса бизга — мураббийларга ва албатта, футболчиларга ҳам боғлиқ. Қанчалик тезроқ буни уддалашса, шунчалик яхши. Бу жараён. Ўйлайманки, рақиб жамоа ҳам бизни хато қилишга мажбур қилади. Шунинг учун биз футболни ҳар томонлама тушунишимиз керак. Мен мураббий сифатида ҳар бир боланинг потенциалини яхши тушунган ҳолда захирани ҳам қилиб, жамоани кучайтиришни ҳам биламиз. Кимнидир бугун ҳам, агар сезган бўлсангиз, ҳимояда ўзгартириш қилдик. Бу энди ҳар бир футболчининг потенциалини билган ҳолда қаерда, қайси йўналишда ўзгариш кераклигини, эпизодни қайси позицияда ўйнашини ва ўйин пайтида ҳам ўзгариш қилиш эҳтимоли каттароқ бўлаётганини кўрсатади. Захирадан ким чиқиб, қандай кучайтиришимиз мумкинлигини ҳам кўрсатяпти. Чунки футбол 90 дақиқадан иборат, фақат бир таймдан эмас. Биз иккинчи таймни ҳам ўйлаб, ким чиқиб, ким кучайтириши мумкинлигини ўйлаймиз. Ўтган ўйинда, «Насаф» билан шу ердаги учрашувда, ҳеч ким кутмаганда иккинчи бўлим бошида 10 киши бўлиб қолдик. Албатта, эпизодда ҳам, лекин тўғри алмаштириш қилдик, тўғри ротация қилдик ва охир-оқибатда ғалаба қозондик. Бу нимани англатади? Жамоа ҳам, мен ҳам битта жамоага айландик. Олдимизда қайси рақиб бўлишидан қатъи назар, кучимиз етади.
- Яқинда «Аякс» ҳамкорлигида футбол академияси очилди. Бунда ўзингиз ҳам иштирок этдингиз. Ҳозирда қандай кутилмалар бор?
- Менимча, бу жуда зўр нарса. Мана шундай академия очилганда, ҳамкорликда нима бўлишидан қатъий назар, барибир Наманган вилояти футболига хизмат қилади. У ердан келган мутахассислар озми-кўпми бу нарсани қолдиришади. Бундай академиялар, албатта, Ўзбекистоннинг бошқа жойларида ҳам очилган. Лекин менимча, бу фақат плюсга ишлайди. Унинг натижасини вақт кўрсатади. Қандай самара беради, қандай мевасини кўрсатади — буни вақт кўрсатади. Ҳозирча асосийси шуки, академия қуриш, майдонлар барпо этиш учун жой ажратилган. Мен бунинг учун хурсандман. Бизда яна майдонлар кўпаяди, академия бўлади. Чунки бу — шароит. Ҳозирги кунда футболимиздаги камчилик — бу майдонларимиз. Қанча майдонларимиз кўп бўлса, шунча яхши. Чунки ҳозир болаларимиз орасида футболга қизиқиш жуда яхши даражада. Шундай футбол инфратузилмаси қанча кўп бўлса, бу, албатта, ўша болаларнинг ўсиши учун катта замин бўлади. Умуман, соғлом турмуш тарзи учун ҳам катта далда, деб биламан. Бу тарафдан хурсандман. Мана шундай академия келиб, ҳамкорликда Наманган вилояти футболи учун ишлаши, уни кучайтириш ва келгусида давом этиши, академия майдонларининг қурилиши — бу жуда зўр нарса», - дея Кападзенинг сўзларини келтиради Tribuna.uz журналисти.
