Словакиядан узоқ йўл босиб, класикога келган «Реал» мухлиси «Камп Ноу»дан чиқариб юборилди

Словакиялик мухлис Франтишек Фаврикнинг айтишича, уни 18 ёшли ўғли билан «Барселона» ва «Реал» ўртасидаги ўйинда Килиан Мбаппенинг голини нишонлаганидан сўнг «Камп Ноу» стадионидан чиқариб юборилган.

Фаврик бу воқеа ҳақида Marca газетасига гапириб берди. У ўғлининг 18 ёшга тўлиши муносабати билан унга совға қилишни ва уни ҳаётида биринчи марта «Эл Класико»га олиб боришни истаган. Оила Словакиянинг Прешов шаҳридан йўлга чиққан: дастлаб машинада Будапештгача тахминан 300 километр йўл босишган, сўнг самолётда Барселонага учиб боришган.

Мухлиснинг сўзларига кўра, у Словакиядаги бир агентлик орқали биринчи тоифали тўртта чиптани 5600 еврога сотиб олган. Ҳар бир чиптанинг нархи 1400 еврони ташкил этган. Фаврик ва унинг ўғли билан бирга эркакнинг дўсти ҳамда дўстининг ўғли ҳам ўйинга борган.

Фаврикнинг таъкидлашича, стадионга кириш пайтида хавфсизлик хизмати ходимлари уларни «Реал» футболкаларида стадионга кириш мумкин эмаслиги ҳақида огоҳлантирган. Унинг айтишича, ундан «Сантиаго Бернабеу» стадионида сотиб олган футболкасини ташлаб юбориш сўралган, аммо у бунга рози бўлмаган. Охир-оқибат ота ва ўғил футболкаларини ечиб, стадионга киришган ва ўйин бошланишига тахминан 20 дақиқа қолганида ўз жойларида футболкаларини қайта кийишган.

Мухлис улар «Барселона» ишқибозларини атайлаб ғазаблантиришга уринмаганини таъкидламоқда. Унинг айтишича, Мбаппе 41-дақиқада гол урган пайтга келиб, улар «Реал» футболкаларида қарийб бир соатдан бери ўтиришган эди. Голдан кейин ота ва ўғил ўринларидан туриб, бир-бирларини қучоқлашган ва голни нишонлашган, сўнг яна жойларига ўтиришган.

Фаврикнинг сўзларига кўра, шундан кейин хавфсизлик хизмати ходимларидан тахминан ўн нафари уларни трибунадан олиб чиқиб кетган. Йўл-йўлакай бошқа томошабинлар уларни ҳуштакбозлик билан кузатиб, ҳақоратли ишоралар кўрсатишган, аммо ота ва ўғил жавоб қайтаришмаган.

Дастлаб уларга футболкаларини ечиш шарти билан трибунага қайтишга рухсат берилгани айтилган. Бироқ хавфсизлик ходимлари рация орқали гаплашганидан кейин қарор ўзгарган. Мухлисга бошқа томошабинлар уларни таниб қолгани ва уларнинг хавфсизлигини кафолатлаш имкони йўқлиги тушунтирилган.

Кейинроқ ота ва ўғил билан полиция ходимлари суҳбатлашиб, ҳужжатларини текширишган. Фаврикнинг таъкидлашича, расмийлаштирилган ҳужжатларда футболкаларни намойиш қилиш ва «Барселона» мухлисларини масхара қилиш ҳолатлари қайд этилган. Шунингдек, зўравонлик ёки зўравонликка ундаш сифатида баҳоланиши мумкин бўлган ҳаракатлар ҳам тилга олинган.

Эркак бу айбловларни рад этмоқда ва воқеага ойдинлик киритиш учун видеоёзувлар ҳамда гувоҳларнинг кўрсатмаларини ўрганишни сўрамоқда.

Охир-оқибат Фаврик ўғли билан таксида жўнаб кетган ва ўйиннинг қолган қисмини телефонида томоша қилган.

Эркакнинг айтишича, у бепул чипталар ёки ўзига алоҳида муносабат кўрсатилишини талаб қилмаяпти. Шунингдек, у икки клуб мухлислари ўртасидаги адоватни кучайтиришни ҳам истамайди.