Скалони: «Сизларга яна бир бор чемпионлик қувончини ҳадя эта олмаганим учун узр сўрайман»

Аргентина миллий жамоаси бош мураббийи Лионел Скалони Жаҳон чемпионатидан кейин мухлисларга мурожаат қилди.

19 июл куни ўтказилган 2026 йилги мундиал финалида Аргентина қўшимча бўлимларда Испанияга 0:1 ҳисобида мағлуб бўлди.

«Ғам ва қувонч, кўз ёши ва табассум, қалб оғриғи ва хотиржамлик қоришиб кетган оғир ҳафтадан сўнг ниҳоят бир неча сатр ёзишга қарор қилдим. Ижтимоий тармоқларни унчалик ёқтирмайман, аммо бу сўзларни сизларга етказишнинг энг яхши йўли шу бўлса керак.

Менда фақат битта нарса қолди — сизларга яна бир кубокни олиб кела олмаганим ва яна бир бор сизларга ғалаба қувончи ҳадя эта олмаганим учун узр сўраш. Балки ўша қувонч сизларга ҳаёт ташвишларини ҳеч бўлмаганда бир неча кунга унуттирган бўларди.

Аммо сизлардан шуни ёдда сақлашингизни истайманки, мен ва футболчиларим — уларни рафиқамга «менинг жангчиларим» деб атаганман — сизларга нимадир кўрсатишга ҳаракат қилдик. Бу — меҳнат, истак, матонат, вазият қанчалик оғир бўлмасин таслим бўлмаслик, ҳатто ҳеч нарсангиз қолмаганида ҳам борингизни бериш, сизни танимайдиганлардан келадиган қаттиқ танқидларга чидаш, мақсад сари интилиш ва оёқларингиз сизга бўйсунмай қолганида ҳам тик туришдир. Мана шу — ҳақиқий соврин.

Мураббийлар штабига, футболчиларга, Аргентина футбол ассоциацияси (AFA) ходимларига, биз учун барча шароитларни яратаётган инсонларга ва ҳар бирингизга меҳрингиз учун чексиз миннатдорлик билдираман. Аргентиналик билан дўстлашган инсон ҳақиқий хазина киритган бўлади», — деб ёзди Скалони.