Шохмалик Комилов: «Жамоанинг потенциали юқори»

Ёзги трансфер ойнаси вақтида «Андижон» сафига 26 ёшли иқтидорли яримҳимоячи Шохмалик Комилов қўшилганини яхши биласиз.

Мухлисларнинг ушбу футболчидан умиди катта. У янги чақирувга тайёр ва ўзини кўрсатиш учун машғулотларда ҳам астойдил ишламоқда. Футболчи «Андижон» аъзосига айлангач, ўзининг илк интервюсини берди.

- «Андижон» клубига қўшилиш таклифи келганида биринчи реакциянгиз қандай бўлди?

- Албатта, мухлислар!

- Янги жамоадаги биринчи кунингиздан сизни энг кўп ҳайратга солган нарса нима бўлди?

- «Андижон»нинг базаси. База жуда ҳам яхши жойда жойлашган. Ҳамма нарса бор, футбол учун. Фақат машғулот қилиш керак ва ўйнаш керак, бўлди.

- Сизни ярим ҳимоячи сифатида қандай таърифлаш мумкин: майдонда кўпроқ «дирижёр»мисиз ёки «жангчи»?

- Дирижёр ва жангчи, иккаласи бирга.

- Футболда сиз учун гўзал пас бериш муҳимроқми ёки натижа учун курашиш?

- Албатта, натижа. Агар натижа бўлса гўзал пас ҳам бўлади.

- Жамоада мослашишингизга кимлар ёрдам берди?

- Жамоада ҳамма билан чиқишиб кетдим. Кўп йигитлар билан танишман, олдин бир жамоада ўйнамаган бўлсам-да. Ҳаммаси яхши.

- «Андижон» мухлислари Шохмалик Комиловдан мавсум давомида нимани кутишлари мумкин?

- Мухлислар ўйлаган даражадан ҳам яхши ўйин кўрсатишимга ишонаман ва ўйинларим билан уларни хурсанд қилишга ҳаракат қиламан.

- Бир кун келиб ўзингиз ҳақингизда «у Андижонда бошқача очилди», деган гапни эшитишни хоҳлайсизми?

- Албатта, хоҳлайман ва Худо хоҳласа шундай бўлишига ишонаман.

- Олдинда «Андижон»ни «Нефтчи»га қарши водий дербиси кутяпти. Бўлажак дербидан нима кутяпсиз?

- Худо хоҳласа, майдонда боримизди бериб жанг қилиб, ғалаба қозонган ҳолда мухлисларни хурсанд қиламиз.

- Бунгача Наманганда «Навбаҳор» учун ўйнадингиз. Энди «Андижон»дасиз. Водийни ушбу жамоаларида мухлислар талабчан...

- Албатта, водийда ўзи ишқибозлар талабчан. Ўйнай олмасангиз танқид қилишади ва буни тўғри ҳам деб ҳисоблайман. Футболчи ўшанда ўсади ва мухлислар тўла стадионда футбол ўйнаш менга завқ беради. Водийда барча мухлислар жамолари учун юракдан ишқибозлик қилишади ва водий жамоаларида футбол ўйнаш футболчига мухлислар томонидан жуда ҳам зўр эмоцияларни тақдим этишади.

- Жамоанинг потенциалини қандай баҳолайсиз?

- Жамоанинг потенциали юқори. Ўзимизга ишониб ишлашда давом етишимиз керак ва буни майдонда кўрсатишимиз лозим.