Рэшфордни «Манчестер Юнайтед»га қайтариш — катта таваккал

Англия терма жамоаси ҳужумчиси «қизил иблислар»нинг мавсумолди йиғинига қўшилиб, яна жамоанинг муҳим футболчисига айланишни мақсад қилмоқда. Аммо бундай қарорни қабул қилишда жуда эҳтиёткор бўлиш керак, деб ёзмоқда Goal.com.

Энди расман тасдиқланди: Маркус Рэшфорд «Манчестер Юнайтед»га қайтмоқда. Шанба куни Швецияда «Пари Сен-Жермен»га қарши ўртоқлик учрашувидаги 1:1 ҳисобидаги дурангдан сўнг жамоа бош мураббийи Майкл Каррик Рэшфорд Ирландия Республикасидаги мавсумолди йиғиннинг кейинги босқичида жамоага қўшилишини маълум қилди. У билан бирга Англия терма жамоасидаги шериги Кобби Майну ва Лисандро Мартинес ҳам йиғинда иштирок этади.

«Мен у билан бирга ўйнаганман. Унинг дебют учрашувида ҳам майдонда бўлганман. Шунинг учун ўртамизда маълум тарих бор. Бу ҳафта Дублинда бутун таркиб йиғилади. Тўғри у ерга учиб борамиз ва бир неча кун давомида тўлиқ таркиб билан ишлаймиз. Маркус ҳам, Кобби ва Лисандро ҳам биз билан бўлади. Уларни кўришни интиқлик билан кутяпмиз», — деди Каррик.

Рэшфорд чоршанба куни «Манчестер Юнайтед» Премиер-лига рақиби «Лидс» билан Дублиндаги «Крок Парк» стадионида ўйнайдиган баҳсда майдонга тушиши мумкин. Уч кундан кейин эса Польшада «Милан»га қарши мавсумолди сўнгги учрашувида ҳам иштирок этиш имконияти бор. Бу ўйинда Рубен Аморим ўзининг собиқ клубига қарши чиқиши керак эди. Аммо португалиялик мутахассис январ ойида «Юнайтед»дан бўшатилди. Бу қарор, мақолага кўра, асосли эди: Аморим атиги 14 ой ишлаб, қаттиққўл тактик схемалари ва ўйин вақтидаги тушунарсиз қарорлари билан футболчилар ва мухлисларни ўзидан бездирганди.

Бироқ Аморим ҳамма ишни нотўғри қилмаган. Айниқса, унинг Рэшфорд билан муносабати жуда қатъий бўлган. Бу «Юнайтед»да маданиятни ўзгартириш жараёнига асос солди ва кейинчалик Каррик ҳам ана шу ўзгаришлар самарасидан фойдаланди. Энди янги бош мураббийнинг энг муҳим вазифаларидан бири — Рэшфордга у лойиқ бўлмаган яна бир имкониятни бериб, аввалги ижобий натижаларни йўққа чиқармаслик.

Рэшфорднинг стандартлари пасая бошлади

Рэшфорднинг «Юнайтед»даги талабларга муносабати 2023/24 йилги мавсумда, Эрик тен Ҳааг қўл остида ўзгариб кетди. Ўша пайтда у клуб билан янги шартнома имзолаб, жамоанинг энг кўп маош олувчи футболчисига айланганди. Шунга қарамай, инглиз футболчиси нидерланд мураббийи белгилаган интизом қоидаларини уч марта бузди.

Энг катта шов-шув эса Белфастда икки кеча давомида спиртли ичимликлар истеъмол қилинган саёҳатдан кейин машғулотга бетоблигини баҳона қилиб келмагани бўлди.

Тен Ҳааг 2024 йил октябрь ойида «Юнайтед» Премиер-лигада 14-ўринга тушиб кетганидан сўнг лавозимидан озод қилинди. Унинг ўрнига «Спортинг»дан Рубен Аморим тезда олиб келинди.

Рэшфорд янги мураббий қўл остида дастлаб яхши ўйнади ва Аморимнинг дастлабки икки учрашувида учта гол урди. Аммо кейин Европа лигасида «Виктория Плзен»га қарши ўйинда жуда ёмон ҳаракат қилди ва 60 дақиқа ҳам тўлмай захирага олинди.

Шундан сўнг Аморим уни «Манчестер Сити»га қарши муҳим дерби учун таркибга киритмади. «Юнайтед» 2:1 ҳисобида ғалаба қозонган ўша учрашувдан кейин португалиялик мураббий Рэшфорднинг машғулотлардаги муносабати талаб даражасида эмаслигига очиқ ишора қилди.

«Биз Раш билан узоқ вақтдан бери нимадир қилишга уриняпмиз, аммо бу иш бермаяпти. Бир хил ишни давом эттирамизми ёки бошқа нарсани синаб кўрамизми? Клубда одамлар ишдан кетayotgan бир пайтда ҳар бир футболчи жамоадаги ўрни учун курашиши керак», — деганди Аморим.

Рэшфорд эса «курашиш» ниятида эмасди. Аксинча, икки кун ўтиб, журналист Ҳенри Уинтерга берган интервьюсида клубдан кетиб, «янги чақирув» излаётганини очиқ билдирди. Бу амалда январь ойида «Юнайтед»ни тарк этиш истаги эди.

Шу лаҳзада у 2016 йилда клуб академиясидан асосий жамоага кўтарилганидан бери уни доим қўллаб-қувватлаб келган мухлисларнинг катта қисми ишончини йўқотди. Жамоага унинг ёрдами энг зарур бўлган пайтда Рэшфорд мухлислар ишончини оқламади. 19 ой давомида воқеалар марказидан четда бўлганидан кейин бу ишончни қайта тиклаш осон бўлмайди.

Ҳеч қандай масъулиятни ўз зиммасига олмади

Рэшфорд қишки трансфер ойнасининг сўнгги кунигача «Юнайтед»да захирада қолди ва охир-оқибат «Астон Вилла»га ижарага ўтди. Бу қарор Рамус Ҳойлунд ва Жошуа Зиркзее ҳужумда қийналаётгани ва «Юнайтед» натижаларда беқарорликни давом эттираётганига қарамай қабул қилинди.

Аморим эса ўз талабларига жавоб бермайдиган футболчини таркибга қайтармаслигини қатъий айтди.

«Сабаби — машғулотлар. Футболчилар машғулотда, ҳаётда қандай бўлиши кераклигини мен қандай кўришимда. Бу ҳар куни, ҳар бир тафсилотда намоён бўлади. Бизга ўйинни ўзгартириш учун бироз тезлик етишмаётганини кўриш мумкин. Аммо менга шу тартиб маъқул. Ҳар куни максимал даражада ҳаракат қилмайдиган футболчини майдонга туширгандан кўра, Жорже Витални тушираман. Бу масалада ўзгармайман», — деди португалиялик мураббий.

Ўша вақтда 63 ёшда бўлган Витал «Юнайтед»нинг дарвозабонлар мураббийи эди. Демак, Аморимнинг гаплари Рэшфорднинг профессионаллигига очиқдан-очиқ берилган қаттиқ баҳо эди.

«Астон Вилла»даги қисқа ижара муддати якунига келиб, Рэшфорднинг ўзига янада кўпроқ саволлар пайдо бўлди. У 17 та учрашувда 10 та гол ва голли узатмага бевосита ҳисса қўшди, Унаи Эмери жамоасига Англия кубоги ярим финали ва Чемпионлар лигасининг ярим финалига чиқишда ёрдам берди.

Англия терма жамоасига қайта чақирилганидан кейин «Престон»га қарши Англия кубоги баҳсида икки гол урган Рэшфорд шундай деди:

«Виллага қўшилгунимга қадар кўп футбол ўйнай олмадим. Ҳозир танам ўзини яхши ҳис қиляпти ва футболдан завқ оляпман».

Бироқ у «Юнайтед»да етарлича ўйнай олмагани учун асосий масъулият айнан ўзида эканини тан олмади. Танасининг ва майдондаги хатти-ҳаракатларининг қисқа вақт ичида бундай кескин ўзгариши эса унинг характери ҳақида ижобий таассурот қолдирмасди.

«Бомбалар гуруҳи» орқали бошланган ижобий ўзгариш

Аморим жамоада муҳитни бузадиган футболчиларга ён беришдан бош тортди. Энди «Юнайтед» ана шу қарорнинг самарасини кўрмоқда.

Рэшфорднинг «Астон Вилла»даги таъсири оммавий ахборот воситалари томонидан бироз бўрттирилди. Ҳа, у янги жамоага яхши мослашди ва айрим эсда қоларли лаҳзаларни яратди. Жумладан, Чемпионлар лигасида ПСЖ устидан 3:2 ҳисобидаги ғалабада ажойиб голли узатма берди. Аммо унинг ўйини изчил эмасди. Шу боис «Вилла» Рэшфордни 40 млн фунтга тўлиқ сотиб олиш имкониятидан фойдаланмади.

Аморим ҳам унинг «Юнайтед»даги мавқеига нисбатан ўз позициясини ўзгартириш учун етарлича сабаб кўрмади.

Рэшфорд «Олд Траффорд»га қайтгач, дарҳол мураббийнинг «бомбалар гуруҳи»га қўшилди. Бу гуруҳда у Антони, Жейдон Санчо, Алехандро Гарначо ва Тайрелл Маласиа билан бирга асосий таркибдан алоҳида машғулот ўтказиши керак эди. Маласиадан ташқари, қолган футболчиларнинг барчаси ўз муносабати билан жамоа кийиниш хонасида турли муаммолар келтириб чиқарганди.

«Юнайтед» муваффақиятсизликлар доирасидан чиқа олмаётганди. Чунки жамоада бирдамлик ҳисси йўқ, ҳамма бир мақсад сари ҳаракат қилаётгани сезилмасди. Энг биринчи ва энг муҳим қадам — жамоадаги ортиқча юкдан халос бўлиш эди. Аморим бу ишни шафқатсиз тарзда амалга оширди.

Гарначо ва Антони мос равишда «Челси» ва «Реал Бетис»га сотилди. Санчо эса мавсумни «Астон Вилла»да ижарада ўтказди. Рэшфорд ҳам яна ижарага кетди — бу сафар «Барселона»га.

Бу трансферлар «Юнайтед»га Матеус Куня, Брайан Мбемо ва Сенне Ламменс каби янги футболчиларни олиб келиш имконини берди. Уларнинг барчаси Манчестердаги фаолиятини яхши бошлади.

Аморимнинг футболга бўлган қараши охир-оқибат ўзини оқламади ва у барча қисмларни бир тизимга бирлаштира олмади. Аммо Каррик жамоа бошига келган пайтда «Юнайтед» таркибидаги муносабатлар, эҳтимол, сэр Алекс Фергюсон давридан кейин биринчи марта ҳақиқий даражада тикланганди.

«Барселона»даги ижара таҳлили

Рэшфорднинг «Барселона»га ўтиши мантиқли қарор эди. Каталония клуби Луис Диас ва Нико Уильямс учун қиммат трансферларни амалга оширишдан воз кечгач, инглиз футболчиси муносиб вариант бўлиб кўринди.

«Барселона» Рэшфорднинг ҳафталик 325 минг фунтлик маошининг 75 фоизини қоплаши керак эди. Шунга қарамай, бош мураббий Ханси Флик ҳужум чизиғида рақобатни кучайтиришни истаган бир пайтда бу ҳисобланган таваккал эди.

Рэшфорд ўзини оқлади: барча мусобақалардаги 49 та учрашувда 28 та гол ва голли узатмага бевосита ҳисса қўшди. «Барселона» Ла Лига ва Испания Суперкубогида ғолиб чиқди.

У ҳатто «Реал»га қарши Эл-Класикода чемпионликни деярли ҳал қилган голни ҳам урди — Тибо Куртуа учун етиб бориш имконсиз бўлган жарима зарбасини дарвоза юқори бурчагига йўллади.

«У билан ишлаш менга ёқди. У ажойиб футболчи ва ажойиб инсон. Жамоа уни соғинади, мен ҳам соғинаман. Аммо ҳаёт шу», — деди Ҳанси Флик бу ҳафта Рэшфорднинг «Камп Ноу»даги фаолияти ҳақида.

Бироқ Рэшфорд Рафиня жароҳат туфайли майдонга тушмагандагина асосий таркибдаги ўрнини кафолатлай оларди. Чап қанотда у бразилиялик футболчи каби самара бера олмади.

Рафинья Рэшфорддан 16 та ўйин кам ўтказганига қарамай, ундан бешта кўп гол урди. Ла Лигада эса Рафиньянинг ҳимоядаги ҳаракатлари ўртача 2,10 тани ташкил этган бўлса, «Юнайтед»дан ижарага олинган футболчида бу кўрсаткич 1,45 бўлди.

Рафинья тўп билан ҳаракатланганда «Барселона»га кўпроқ ижодкорлик ва ҳужумкорлик, тўпсиз ўйинда эса юқори интенсивлик ва интизом берди. Агар собиқ «Лидс» футболчиси бутун мавсум давомида соғлом бўлганида, Рэшфорд эҳтимол таркибдаги оддий захира футболчиси бўлиб қоларди.

Таваккал мукофотдан устун

Охир-оқибат «Барселона» Рэшфордни 30 млн евро эвазига сотиб олиш имкониятидан фойдаланмади. ESPN маълумотига кўра, каталонияликлар «Юнайтед» билан арзонроқ нарх бўйича келишишга уринган, аммо музокаралар муваффақиятсиз якунланган.

Шундан сўнг «Барселона» Энтони Гордон ва Карим Адейемини жами 92 млн еврога сотиб олди.

Гордон Рэшфорднинг ўрнини тўғридан тўғри эгаллади. «Барселона»ни унинг ўтган мавсум Чемпионлар лигасида «Нюкасл» сафидаги юқори самарадорлиги қизиқтирди. Бундан ташқари, унинг юқори ишчанлиги Флик тизимига кўпроқ мос келади.

Қизиғи, Гордон «Камп Ноу»даги беш йиллик шартномаси давомида йилига 14 млн евро ялпи маош олади. Бу Рэшфорд ўтган мавсумда олган маош билан бир хил. Демак, «Барселона» фақат молиявий жиҳатдан арзонроқ вариантни танлагани йўқ.

Рэшфорд Гордондан уч ёш катта ва Жаҳон чемпионатида ҳам унга асосий таркибдаги ўринни бой берди. Гордон икки инглиз қанот ҳужумчисининг ишчанроғи ҳисобланади ва ҳали янада ўсиши мумкин.

Рэшфорднинг энг яхши версияси 2022/23 йилги мавсумдан бери кўрингани йўқ. Ўша мавсумда у фаолиятида илк марта бир мавсумда 30 та гол урганди. Эҳтимол, Рэшфорд ўз чўққисига айнан ўша пайтда чиққан.

«Юнайтед»даги ҳозирги вазият ҳам Рэшфорд муваффақият қозониши учун идеал эмас. Жамоа ёзги трансфер ойнасида жуда фаол бўлмади. Шунинг учун «Юнайтед» ўтган мавсумда Премьер-лигада эгалланган учинчи ўринни янада яхшилаш ва Чемпионлар лигасида узоқроқ бориш учун етарлича захирага эга ёки йўқлиги ҳали номаълум.

Каррик ва INEOS бошчилигидаги раҳбарият Рэшфордни жамоага қайтариш имкониятини кўриб чиқаётгани тушунарли. Чунки «қизил иблислар» ҳужумнинг чап қанотида ва марказида футболчилар етишмаслигини ҳис қилмоқда.

Аммо бу қарорнинг хавфи эҳтимолий фойдасидан устун.

Агар «Юнайтед» мавсумни ёмон бошласа ва Каррикка босим кучайса, тарих Рэшфорд бундай вазиятларда руҳан тушиб кетишини кўрсатмоқда. Шунда жамоа яна бир кераксиз ички муаммога дуч келиши, диққат футболдан чалғиши ва клуб яна бошланғич нуқтага қайтиши мумкин.

«Жуда катта баёнот» керак

Каррик Рэшфорддан энг яхши футболни чиқара олиши мумкин. Аммо бунинг учун футболчининг ўзи ҳам тўлиқ садоқатини кўрсатиши шарт.

Англия терма жамоасида ўйнаган Майкл Грей яқинда talkSPORT эфирида бу муаммони ҳал қилишнинг оддий, аммо таъсирчан йўлини таклиф қилди:

«Агар Рэшфорднинг «Манчестер Юнайтед»да келажаги бўлса, у нима учун «Юнайтед»да қолишни исташи ва биринчи навбатда нима сабабдан клубни тарк этганини жуда катта баёнот орқали тушунтириши керак. Менимча, бу биринчи навбатда қилиниши лозим бўлган иш».

Нималар нотўғри кетгани учун масъулиятни ўз зиммасига олиш ва «Юнайтед»га содиқлигини қайта тасдиқлаш Рэшфордга мухлислар билан бузилган муносабатларни тиклашда катта ёрдам берган бўларди.

Грей, шунингдек, Рэшфорд Матеус Кунья ва Бенжамин Шешко каби футболчилар ортида «иккинчи даражали футболчи» ролига кўникиши кераклигини айтди. Бу эса ундан ўз нафсини жиловлаш ва жамоа манфаати учун бор кучини беришга тайёр эканини кўрсатишни талаб қилади.

«Барселона»даги тажрибаси бу борада унга ёрдам бериши мумкин.

Эҳтимол, Каррик Рэшфорддан ҳурмат талаб қилиш масаласида Аморим ва Тен Хагдан кўра омадлироқ бўлар. Чунки унинг «Юнайтед» футболчиси сифатидаги обрўси жуда юқори ва Рэшфорд билан аввалдан яхши муносабати бор.

Улар икки мавсум давомида жамоадош бўлган. Бундан ташқари, Каррик Рэшфорд билан Жозе Моуриньо ва Уле-Гуннар Сульшер штабларида мураббий ёрдамчиси сифатида ҳам яқин ишлаган. Шунинг учун у Рэшфорднинг энг яхши жиҳатларини қандай намоён қилишни яхши билади.

Аммо Рэшфорд ҳеч нарса бўлмагандек «Юнайтед»га шунчаки қайтиб келолмайди.

Агар у жамоадаги ўрнини қайтадан меҳнат билан қўлга киритишга тайёр бўлмаса, «Юнайтед» ҳозирги футболчилари билан қолгани маъқул.

Мухлислар жамоадан кутилган ҳақиқий ўзгаришни кўриш учун сабр қилишлари керак. Аммо футболчиларнинг шахсий манфаати ва таъсири яна жамоавий мақсадлардан устун қўйиладиган бўлса, бу инқилоб ҳеч қачон бошланмайди.