«Нюкасл» клуби Маттиас Яйсслени бош мураббийи этиб тайинлаганини эълон қилди.
Қайд этилишича, германиялик 38 ёшли мутахассис «қарғалар»ни 2029 йилнинг ёзига қадар бошқаради. Бунга қадар у 2023 йилдан буён Саудия Арабистонининг «Ал Аҳли»да ишлаётганди. Клуб билан кетма-кет икки бор Элит Осиё Чемпионлар лигасида ғолиб чиқди.
«Нюкасл» бош мураббийига айланганим мен учун катта шараф. Бу Европа футболидаги энг йирик клублардан бири бўлиб, ўзига хос тарих, анъана ва содиқ мухлисларга эга. Бу клубнинг муҳити ва мухлислар иштиёқини шахсан ҳис қилиш имкониятидан жуда хурсандман. Клубнинг юксак мақсадлари, келажакка қаратилган режалари ва имкониятлари уни жуда жозибадор қилади. Мен сўнгги йилларда клубнинг ривожланишини диққат билан кузатиб келдим ва эришилган тараққиёт барчага яққол кўриниб турибди. Келажак мени жуда руҳлантирмоқда.
Мен ушбу лойиҳага, клубнинг мақсадлари ва танлаган йўлига тўлиқ ишонаман. Бу ерда аниқ стратегия, кучли раҳбарият ва янада юксалиш учун мустаҳкам пойдевор мавжуд. Футболчилар, мураббийлар штаби ва раҳбарият билан биргаликда ишлаб, «Нюкасл»ни янада юқори поғоналарга олиб чиқишни интизорлик билан кутяпман. Клубнинг янги ютуқларга эришиши учун бор кучимни сафарбар қиламан», — деди Яйссле клуб расмий сайтига берган интервюсида.
Мухлислар бу янгиликни Telegram’да муҳокама қилмоқда
Изоҳлар Telegram’да очилади