«Барселона» ҳужумчиси Рафиня клуб билан шартномасини узайтирганидан сўнг, келажаги ва фаолиятини якунлаш истаги ҳақида гапирди. Бразилиялик футболчи Каталония клубида фаолиятини тугатишни жуда хоҳлашини таъкидлади.
«Мен жуда фахрланяпман. Жамоа ичида нималарни бошдан кечирганимизни фақат ўзимиз биламиз. Умид қиламанки, оёқларим юқори савияда ўйнашда давом этишимга имкон берса, бу ерда яна бир неча йил қоламан. Фаолиятимни «Барселона»да якунлашни жуда истардим, аммо ҳаммаси жисмоний ҳолатимга боғлиқ», — дея Рафинянинг сўзларини Маrcа нашри келтирмоқда.
Маълумот учун, 29 ёшли Рафиня «Барселона» сафига 2022 йил ёзида «Лидс»дан келиб қўшилган. У каталонияликлар билан уч марта Испания чемпионлиги, бир марта мамлакат кубоги ва уч марта Суперкубокни қўлга киритган.
Эслатиб ўтамиз, 5 ноябр куни бразилиялик футболчи «Барселона» билан шартномасини 2030 йил ёзигача узайтирди.
