Франция миллий жамоасининг собиқ яримҳимоячиси Самир Насри Африка футбол конфедерациясининг (CAF) 2026 йилги Африка Миллатлар Кубогида Марокашга ғалабани бериш қарорини танқид қилди.
CAF финалдан икки ой ўтиб, Марокаш апелляциясини қаноатлантирди ва 90+8-дақиқада Браҳим Диасга нисбатан қўполлик учун белгиланган пеналтидан кейин норози бўлиб, майдонни тарк этгани сабаб Сенегал миллий жамоасига финал учун 0:3 ҳисобида техник мағлубият ёзди.
Ўшанда финал 13 дақиқадан кейин қайта бошланган ва Браим пеналтини голга айлантира олмаганди. Беллашув сенегалликларнинг ғалабаси (1:0) билан якунланганди.
«Агар улар (CAF) баёнотни ўйин куни кечқурун ёки эртаси куни беришганида, тушунган бўлардик, лекин бундай эмас… Кейинги сафар буни 2035 йилда эълон қилишадими?
Бу кулгили: сенегалликлар кубок билан уйга қайтишди, нишонлашди ва базм уюштиришди — энди нима қилиш керак? Ростини айтсам, бу CAF'нинг яна бир обрўсизланишидир», — дея Насрининг сўзларини келтиради RMC Sport.
