Тошкентнинг «Локомотив» жамоаси Муборакнинг «Машъал» клубини қабул қилиб, 3:0 ҳисобида рақибини таслим қилди. Ўйиндан кейин мезбонлар бош мураббийи Мирко Еличич матбуот анжуманида иштирок этди.
— Аввало, вазият осон эмаслигини ҳаммамиз тушуниб турибмиз. Йигитлар ўзларини яхши жамлай олиб, ўйин охиригача курашгани қувонарли. Ростини айтсам, ўйин бунчалик қийин кечишини кутмаган эдик. Жамоага ҳозир аввалгидек босим йўқ. Шунинг учун футболчилар эркинроқ ҳаракат қилиб, қўрқмасдан ўйнашлари мумкин. Бугун буни кўрсатишди. Улар учун бу осон ўйин бўлмади. Замонавий футболда ўйин тобора очиқ тус олаётганини кўряпмиз. Бундай вазиятда ўйин охиригача ҳудудларни аввалгидек қаттиқ ёпиб туришнинг иложи йўқ. Шунинг учун бугун биз учун сабрли бўлиш, шошилмаслик ва ўз ўйин интизомимизни сақлаш жуда муҳим эди.
— Жадвалдаги тўртинчи ўрин сиз учун нимани англатади?
— Ҳали олдинда тўққиз тур бор. Охирги ўринлар чемпионат 30 турдан кейин якунланганида аниқланади. Ҳозир биз бу ҳақда ўйлаётганимиз йўқ. Одатда жадвалга қарамаймиз. Бизнинг вазифамиз — ўз ўйинимизга индивидуал жиҳатдан нималар қўша олишимиз, уни қандай яхшилашимиз мумкинлиги ҳақида ўйлаш. Албатта, бошқалар жадвалга қарашади. Биз учун эса биринчи навбатда ўз ўйинимиз муҳим. Унга нималар қўшишимиз, нималарни тўғрилашимиз мумкинлиги устида ишлаймиз ва ўз томонимиздан қилаётган ишларимиздан қониқиш ҳосил қилишни истаймиз. Лекин йигитлардан мамнунман. Қаерда чемпионатни якунлашимиз, ростини айтсам, биз учун унчалик муҳим эмас. Биз учун бу мавсумдан нималар олишимиз муҳим. Масалан, футболчиларнинг ривожи, клубнинг бу мавсумда фақат жадвалдаги ўрин эмас, балки анча кўпроқ нарсага эриша олиши муҳим.
— Жаъфар Баҳодировни майдонга туширганингиз олдиндан режалаштирилган қарормиди ёки вазиятдан келиб чиқиб шундай қилдингизми?
— Шунчаки қаранг, ўша вазиятда бизга энергия етишмаётган эди. Динонинг ҳам кучи камайганди. Тима ва Сардор ҳам... Тима ҳар бир ўйинда жуда кўп ишлайди. Унинг даражасидаги футболчи ҳам тўп билан, ҳам тўпсиз жуда катта ҳажмда иш бажаради. Шунинг учун ўша пайтда бизга янги куч ва энергия керак эди.
— Тўрт кундан кейин «Бунёдкор» билан, ундан беш кун ўтиб эса «Нефтчи» билан ўйнайсизлар. Жамоани тайёрлаш учун бу вақт камлик қилмайдими?
— Йўқ. Бу аввало тайёргарлик жараёнидаги урғуларни ўзгартиради, холос. Ҳозир биз кўпроқ тикланишга эътибор қаратамиз. Чунки ниманидир кўпайтириш, футболчилар ўртасида кўп нарсани боғлаш учун вақт жуда кам.
Асосийси — кўплаб таҳлилларни амалга ошириш, тўхтаб, нималарни ўзгартириш кераклигини кўриб чиқиш. Биз нималар қилишимиз кераклигини тушунамиз. Жамоа бошқа рақибга қарши ўз ўйинини қандай қилиб энг яхши тарзда тўғрилай олишини биламиз. Албатта, «Машъал»га қарши ўйиндан кейин бошқа мавзуга ўтамиз. У ерда ҳам ниманидир ўзгартиришимиз керак. Асосий масала — ўйинга қандай кириб боришимиз.
— Жамоангизни кузатганимизда, у тобора ритмга кириб бораётганини кўряпмиз. Аста-секин, босқичма-босқич юқорига кўтариляпти. Сизнингча, дунёдаги қайси мураббийларни кузатасиз? Кимлардан ўрганасиз? Жамоани шу тарзда ритмда ушлаб туриш ва уни аста-секин кучайтириш учун кимларга қарайсиз? Чунки баъзи жамоалар бирданига ғалаба қозонади, кейин мағлубиятлар кетма-кетлиги бошланади. Сизларда эса аксинча — ритм…
— Жуда кўп жамоалар бор. Кимлардан ўрганишим ҳақида сўраяпсизми? Илгари ҳам менга ёққан... Менинг севимли жамоам — «Ливерпуль». Ҳар доим улар менга ёққан. Клопп жамоани қандай тайёрлагани, унда қандай энергия бўлгани менга жуда маъқул эди. «Барселона» ҳам — уларнинг ўйинни назорат қилиши, футболчиларнинг сифати, майдондаги назорат... Бу ҳам менга ёқади.
Илгари, масалан, Бьелса ҳам менга ёққан. Унинг «Лидс»даги иш услубини кузатганман. Менимча, замонавий футбол ҳозир шу томонга қараб кетяпти. Ҳозир Италия жамоаларини ҳам кузатишингиз мумкин. Масалан, Фабрегас ишлаётган жамоа бор.
Жуда кўп нарса ўзгаряпти. Ҳозир энг муҳими — позиционал эмас, балки футболчиларнинг ўйинга қанчалик тайёр экани, қўшимча ҳаракатлари, жамоага қанчалик кўп нарса қўша олиши. Ким кўпроқ қўшимча иш бажарса, кўпроқ муваффақиятга эришади. Ҳозир «Челси» ҳам худди шу каби қўшимча ҳаракатларни намойиш қила бошлади. «Комо»да ҳам шундай ҳолатни кўряпсиз, тўғрими?
— Ҳа. Сиз икковингиз ташқи кўринишингиз билан ҳам бир-бирингизга ўхшайсиз. У Испания миллий жамоаси билан Европа ва жаҳон чемпиони бўлди. Биз ҳам сизга Ўзбекистон чемпиони бўлишингизни ёки Кубокни ютишингизни тилаймиз.
— Раҳмат», - дея Еличични сўзларини келтиради Tribuna.uz мухбири.
