«Милан» келгуси трансфер ойналарига тайёргарликни бошлаб юборди. Клуб «Наполи»да айрим келишмовчиликларга дуч келаётган шотландиялик яримҳимоячи Скотт Мактоминейга қизиқиш билдирмоқда.
Pianetamilan.it нашрининг Calciomercato.com маълумотларига таяниб хабар беришича, «россонери» футболчини ўз сафига қўшиб олишни мақсад қилган.
Мактоминейнинг «Наполи» билан амалдаги шартномаси 2028 йилгача мўлжалланган. Бироқ томонлар келишувни узайтириш борасидаги музокараларда ҳозирча бир тўхтамга кела олмаган. Бу вазият «Милан»нинг футболчини қўлга киритиш имкониятларини ошириши мумкин.
Шу билан бирга, италияликлар Мадриднинг «Реал» клуби билан рақобатлашишига тўғри келади. Испания гранди ҳам аввал «Манчестер Юнайтед»да тўп тепган яримҳимоячи атрофидаги вазиятни диққат билан кузатмоқда.
Маълумот учун, Мактоминей 2024 йил ёзида «Манчестер Юнайтед»дан «Наполи»га кўчиб ўтган.
