«Реал» ҳужумчиси Килиан Мбаппе жамоадошларининг аксарияти билан фақат профессионал муносабатда. Бу ҳақда The Touchline OK Diario манбасига таяниб хабар берди.
Манбага кўра, Мбаппе ва Винисиус Жуниор ўртасидаги муносабатлар ҳам дўстлик даражасида эмас. Гарчи улар жамоатчилик олдида яқин кўринсада, футболчилар бир-бири билан яқинлашишга алоҳида интилмайди.
«Уларнинг муносабатлари асосан профессионал характерга эга. Шу билан бирга, иккисидан ҳеч бири бир-бирига янада яқинлашишга алоҳида интилмайди», — дея манба сўзларини келтиради нашр.
Шунингдек, жамоада Жуд Беллингҳэм билан боғлиқ маълум таранглик ҳам борлиги айтилмоқда. Аввалроқ англиялик яримҳимоячига Мбаппе ва Винисиуснинг айрим хатти-ҳаракатлари ёқмагани ҳақида хабарлар тарқалган. «Реал» раҳбарияти эса Беллингҳэмдан сабрли бўлишни ва айрим ҳолатларга ортиқча эътибор қаратмасликни сўраган.
Маълумот учун, «Реал» раҳбарияти жамоа ичидаги тарангликни камайтириш ва асосий юлдузларнинг келишмовчиликларга қарамай биргаликда самарали ишлашини таъминлашга ҳаракат қилмоқда.
