«Ланс» яримҳимоячиси Мамаду Сангаре фаолиятини Англия Премер-лигасида давом эттириши мумкин.
Foot Mercato нашрининг хабар беришича, 24 ёшли футболчига «Манчестер Юнайтед» жиддий қизиқиш билдирмоқда.
Сангаре ўтган ёзда Австриянинг «Рапид» клубидан 8 миллион евро эвазига «Ланс» сафига қўшилган эди. Ушбу трансфер француз клуби учун ўзини тўлиқ оқлади.
2025/26 йилги мавсумда малиялик яримҳимоячи барча мусобақаларда 33 та баҳсда майдонга тушиб, 3 та гол ва 4 та голли узатмага муаллифлик қилди.
У мавсум якунида Франция чемпионатининг энг яхши африкалик футболчиси деб топилди ва Марк-Вивен Фоэ номидаги совринни қўлга киритди.
Манба маълумотига кўра, Сангарега Европанинг ўндан ортиқ клуби қизиқиш билдирмоқда. Бироқ айнан «Манчестер Юнайтед» трансфер бўйича энг фаол жамоа сифатида кўрилмоқда.
Каземиронинг кетишидан сўнг манкунианликлар яримҳимоя чизиғини кучайтиришни режалаштирмоқда ва Сангаре асосий номзодлардан бири ҳисобланади.
Қайд этилишича, футболчининг «Ланс» билан амалдаги шартномаси 2030 йилгача мўлжалланган. Шунга қарамай, клуб раҳбарияти уни сақлаб қолиш қийин бўлишини тушунмоқда.
Маълумот учун, ҳозирча «Манчестер Юнайтед» томонидан расмий таклиф юборилмаган. Трансфер суммаси 40 миллион евродан ошиши мумкин.
