«Манчестер Сити» ўтган ёзда «Барселона» яримҳимоячиси Френки де Йонгга қизиқиш билдирган, бироқ кейинчалик футболчини трансфер қилишдан воз кечган. Бу ҳақда The Touchline хабар берди.
Манба маълумотига кўра, Англия клуби раҳбарияти «Барселона» вакиллари билан алоқага чиққан. Эҳтимолий трансфердан олдин «Манчестер Сити» футболчининг тиззасидаги жароҳат билан боғлиқ тиббий ҳужжатлар билан танишишни истаган.
Бироқ ҳужжатлар ўрганилгач, «Манчестер Сити» де Йонг трансфери бўйича ишларни давом эттирмасликка қарор қилган. Шу тариқа нидерландиялик яримҳимоячининг Англия клубига ўтиши амалга ошмаган.
Де Йонг 2019 йилдан буён «Барселона» шарафини ҳимоя қилиб келмоқда. У каталонияликлар сафида барча мусобақаларда 297 та баҳсда майдонга тушиб, 20 та гол урган ва 31 та голли узатмани амалга оширган.
Маълумот учун, 29 ёшли футболчининг «Барселона» билан амалдаги шартномаси 2029 йилгача мўлжалланган.
