«Реал» яримҳимоячи Жуд Беллингҳэм билан шартномани узайтириш устида ишламоқда. The Touchline хабарига кўра, Мадрид клуби келажакда Англия Премер-лигаси жамоалари футболчи учун таклиф билан чиқиши мумкинлигини ҳисобга олмоқда.
Шу сабабли «Реал» Беллингҳэм билан узоқ муддатга мўлжалланган янги шартнома тузмоқчи. Мадрид клуби футболчининг келажагини олдиндан кафолатлаш ва АПЛ клубларининг эҳтимолий қизиқишига қарши чоралар кўришни мақсад қилган.
Бир неча кун аввал матбуотда «Реал» Беллингҳэм билан маоши оширилган янги шартнома имзолаши ҳақида хабарлар тарқалганди.
23 ёшли футболчининг Мадрид клуби билан амалдаги шартномаси 2028/29 йилги мавсум якунигача мўлжалланган. Беллингҳэм «Реал» сафида 148 та баҳсда майдонга тушиб, 49 та гол урган ва 36 та голли узатмани амалга оширган.
Маълумот учун, Беллингҳэм 2023 йил ёзида «Боруссия Дортмунд»дан «Реал» сафига кўчиб ўтган.
