Ромелу Лукаку «Наполи»дан «Фенербаҳче»га ўтганидан сўнг янги жамоаси мухлисларига мурожаат қилди. Белгиялик ҳужумчи фақат голлар уриш билан чекланиб қолмаслигини, жамоа ва мухлислар билан яқинроқ алоқа ўрнатишни истаётганини айтди.
«Менимча, душанба куни дарсларни бошлайман. Турк тилини ўрганмоқчиман. Фаолиятим давомида ҳар бир клубда одамлар билан мулоқот қила олишни хоҳлаганман. Умид қиламанки, уч-тўрт ой ичида турк тилида гаплаша оламан. Бу осон бўлмайди, аммо қўлимдан келганини қиламан», — деди Лукаку «Фенербаҳче»нинг YouTube каналига берган интервюсида.
Белгиялик футболчи трансфер ниҳоят амалга ошганидан хурсанд эканини ҳам таъкидлади.
«Бу трансферни бир ойдан бери кутаётгандим. Бу ерда бўлиш мен учун шараф. Мен буни узоқ вақт давомида хоҳлагандим», — деди ҳужумчи.
Лукакунинг Туркия билан алоқаси оиласи тарихи билан ҳам боғлиқ. Унинг отаси 1996 йилда Туркияда футбол ўйнаган.
«Отам 1996 йилда Туркияда ўйнаган. Шу сабабли бу гўзал мамлакат мен учун иккинчи уйдек. Ўша кунларни ҳали ҳам яхши эслайман. Айнан ўша пайтда профессионал футболчи бўлишни хоҳлаганимни англаганман», — деди Лукаку.
Шунингдек, унинг акаси Жордан ҳам Туркияда футбол ўйнаган. Лукаку фаолиятида Туркиядаги ягона баҳсини айнан «Фенербаҳче»нинг уй стадионида ўтказган.
Маълумот учун, 33 ёшли Ромелу Лукаку «Фенербаҳче»га «Наполи»дан кўчиб ўтди.
