«Наполи» ҳужумчиси Ромелу Лукаку «Фенербаҳче»га ўтишга розилик берди. Бу ҳақда журналист Маттео Моретто хабар берди.
Маълум қилинишича, 33 ёшли белгиялик футболчи ва Туркия клуби ўртасида эҳтимолий трансфер шартлари бўйича тўлиқ келишувга эришилган. Энди «Фенербаҳче» «Наполи» билан музокаралар олиб бормоқда.
Истанбулликлар ҳужумчи учун аллақачон биринчи таклифини берган, бу тахминан 6 миллион еврога тенг экани айтилмоқда. Шунга қарамай, «Наполи» Лукаку учун 12 миллион евро олишни кутмоқда.
Маълумот ўрнида, белгиялик футболчининг Неапол клуби билан шартномаси 2027 йил ёзига қадар амал қилади. Аввалроқ Лукаку фаолиятини MLSда давом эттириши мумкинлиги маълум қилинганди.
