Лапорта: «Алвареснинг «Барса»га ўтмаслиги ҳақида кўп гапиришди, аммо у келади»

«Барселона» президенти Жоан Лапорта каталонияликлар «Атлетико»га ҳужумчи Хулиан Алварес трансфери бўйича расмий таклиф юборганини тасдиқлади.

Бундан аввал мадридликлар бош директори Мигел Анхел Хил Марин клуб аргентиналик футболчини на 100 миллион, на 200 миллион еврога сотишга рози бўлмаслигини айтганди.

«Биз таклиф бердик. Бу — мураббийимиз таркибда кўришни истаётган футболчи. Шунинг учун ҳам «Атлетико»га расмий таклиф йўлладик. Бизнингча, бу жуда жиддий ва жуда яхши таклиф.

Ҳар кимнинг фикрини ҳурмат қиламан. Мигел Анхелнинг ҳам, бошқаларнинг ҳам фикрини ҳурмат қиламан. Илгари ҳам кўп бор «бу футболчи ҳеч қачон «Барселона»га ўтмайди» дейишган, аммо охир-оқибат у келади.

Агар футболчи кетишни хоҳласа, «Барселона»нинг позицияси шундай: унга тўсқинлик қилмаймиз. Катта клуб норози футболчиларни мажбуран ушлаб туриши мумкин эмас.

Масала фақат берилган таклифда эмас. Аммо яхши таклиф тушса, ундан унумли фойдаланиш керак», — дея Лапортанинг сўзларини келтиради Marca.