Нидерландиялик собиқ ҳужумчи Дирк Куйт расман Истанбулнинг «Фенербаҳче» клубига қайтди.
Клуб матбуот хизмати маълум қилишича, Куйт жамоа бош мураббийи Исмоил Карталнинг биринчи ёрдамчиси этиб тайинланган. Шартнома имзолаш маросими клуб офисида бўлиб ўтган.
«Фенербаҳче» раҳбарияти 120 йиллик юбилей мавсумида Куйтнинг тажрибаси жамоага чемпионлик учун курашда ёрдам беришига умид қилмоқда.
«Дирк Куйт футболчилик фаолияти давомида клубимизнинг чемпионлигида муҳим рол ўйнаган ва фидойилиги билан мухлислар меҳрини қозонган эди. У уйига қайтди. Баъзи ришталар қайтадан яратилмайди — улар ҳеч қачон узилмайди. Хуш келибсан, Дирк Куйт», — дейилади «Фенербаҳче» баёнотида.
Маълумот учун, Дирк Куйт 2012–2015 йилларда «Фенербаҳче» сафида тўп тепган ва Туркия чемпионати ғолибига айланган. Фаолияти давомида у «Фейеноорд», «Ливерпул» ва Нидерландия миллий жамоаси сафидаги ўйинлари билан ҳам катта шуҳрат қозонган.
