Туркиянинг «Фенербаҳче» клуби Испаниянинг «Малорка» жамоаси ҳужумчиси Ведат Мурикининг трансфери бўйича келишувга эришганини расман маълум қилди.
Клуб хабарига кўра, косоволик футболчи бугун, 18 июн куни тиббий кўрикдан ўтиш ва трансфернинг сўнгги тафсилотларини ҳал қилиш учун Туркияга етиб келади.
«Ведат Мурикини олиб келаётган самолёт маҳаллий вақт билан соат 21:00 да Сабиҳа Гўкчен аэропортининг халқаро терминалига қўнади», — дейилади «Фенербаҳче» баёнотида.
Мурикининг трансфери бежиз катта қизиқиш уйғотмаяпти. 2025/26 йилги Ла Лига мавсумида у 23 та гол билан чемпионатнинг иккинчи энг яхши тўпурари бўлди.
Ундан фақат «Реал» ҳужумчиси Килиан Мбаппе (25 гол) кўпроқ гол уришга муваффақ бўлди.
Шунингдек, Мурики «Барселона» юлдузи Ламин Ямал ва «Реал» вингери Винисиус Жуниорни ортда қолдирди. Ҳар икки футболчи мавсумни 16 тадан гол билан якунлаган.
Қизиғи, Мурикининг ёрқин ўйинларига қарамай, унинг клуби «Малорка» мавсум якунида Сегунда дивизионга тушиб кетди.
2025/26 йилги Ла Лига тўпурарлари:
Килиан Мбаппе («Реал») — 25 гол
Ведат Мурики («Малорка») — 23 гол
Ламин Ямал («Барселона») — 16 гол
Винисиус Жуниор («Реал») — 16 гол
