«Манчестер Юнайтед» ва Дания миллий жамоасининг собиқ дарвозабони Петер Шмейхел Португалия бош мураббийи Роберто Мартинес фаолиятига танқидий баҳо берди.
Португаллар ЖЧ-2026 гуруҳ босқичидаги илк учрашувда Конго ДР билан 1:1 ҳисобида дуранг ўйнагач, Шмейхел мураббийнинг қарорларини савол остига қўйди.
«Роберто Мартинес ушбу жаҳон чемпионатидаги энг кўп ҳафсала пир қилаётган мураббийлардан бири. У Белгиянинг олтин авлодини совринсиз қолдирди ва ҳозир худди шу ҳолат Португалия билан ҳам такрорланаётгандек», — деди Шмейхел.
Собиқ дарвозабон, айниқса, Мартинеснинг таркиб танловидан норози эканини яширмади.
«Жоау Феликс ва Рафаел Леау каби футболчиларни захирада қолдириб, ишламаётган тизимга ёпишиб олишни тушуниш қийин. Португалия ҳужумда жуда катта салоҳиятга эга, аммо жамоа ҳаддан ташқари эҳтиёткор ва олдиндан тахмин қилинадиган футбол ўйнамоқда», — дея таъкидлади у.
Шмейхелнинг фикрича, Португалия миллий жамоасининг асосий муаммоси мураббийнинг консерватив ёндашувида.
«Ҳужумда креативлик етишмайди, яримҳимоя кўпинча бир бутун жамоа сифатида ҳаракат қилмайди. Ўзгаришлар эса одатда жуда кеч амалга оширилади», — деди даниялик афсона.
У якунда Португалия таркибини мундиалдаги энг кучли жамоалардан бири деб атади.
«Португалия турнирдаги энг кучли таркиблардан бирига эга. Аммо улар ўз имкониятларининг ярмисини ҳам намойиш қилмаяпти. Агар вазият тез орада ўзгармаса, жамоа жаҳон чемпионлигини қўлга киритиш учун яна бир ажойиб имкониятни бой бериши мумкин», — дея хулоса қилди Шмейхел.
