«Manchester Yunayted» va Daniya milliy jamoasining sobiq darvozaboni Peter Shmeyxel Portugaliya bosh murabbiyi Roberto Martines faoliyatiga tanqidiy baho berdi.
Portugallar JCH-2026 guruh bosqichidagi ilk uchrashuvda Kongo DR bilan 1:1 hisobida durang o‘ynagach, Shmeyxel murabbiyning qarorlarini savol ostiga qo‘ydi.
«Roberto Martines ushbu jahon chempionatidagi eng ko‘p hafsala pir qilayotgan murabbiylardan biri. U Belgiyaning oltin avlodini sovrinsiz qoldirdi va hozir xuddi shu holat Portugaliya bilan ham takrorlanayotgandek», — dedi Shmeyxel.
Sobiq darvozabon, ayniqsa, Martinesning tarkib tanlovidan norozi ekanini yashirmadi.
«Joau Feliks va Rafael Leau kabi futbolchilarni zaxirada qoldirib, ishlamayotgan tizimga yopishib olishni tushunish qiyin. Portugaliya hujumda juda katta salohiyatga ega, ammo jamoa haddan tashqari ehtiyotkor va oldindan taxmin qilinadigan futbol o‘ynamoqda», — deya ta’kidladi u.
Shmeyxelning fikricha, Portugaliya milliy jamoasining asosiy muammosi murabbiyning konservativ yondashuvida.
«Hujumda kreativlik yetishmaydi, yarimhimoya ko‘pincha bir butun jamoa sifatida harakat qilmaydi. O‘zgarishlar esa odatda juda kech amalga oshiriladi», — dedi daniyalik afsona.
U yakunda Portugaliya tarkibini mundialdagi eng kuchli jamoalardan biri deb atadi.
«Portugaliya turnirdagi eng kuchli tarkiblardan biriga ega. Ammo ular o‘z imkoniyatlarining yarmisini ham namoyish qilmayapti. Agar vaziyat tez orada o‘zgarmasa, jamoa jahon chempionligini qo‘lga kiritish uchun yana bir ajoyib imkoniyatni boy berishi mumkin», — deya xulosa qildi Shmeyxel.
