Италия миллий жамоасининг собиқ ҳужумчиси Антонио Кассано Массимилиано Аллегри фаолиятини давом эттириши мумкин бўлган клуб ҳақида фикр билдирди. Унинг тахминича, мураббий «Наполи»ни тарк этганидан кейин «Фиорентина»ни бошқаради ва у ерда клуб спорт директори Фабио Паратичи билан яна бирга ишлайди.
Кассано «Наполи»нинг «Лацио»га қарши 1:1 ҳисобидаги дурангидан сўнг Viva el Football эфирида Аллегри фаолиятини кескин танқид қилди.
«У ҳамон ҳамма нарсани барбод қилмоқда, аммо ҳеч ким ҳеч нарса демаяпти ва уни истеъфога чиқармаяпти. У мантиққа тўғри келмайдиган гапларни айтади ва жамоани бошқаришни билмайди. Икки клубнинг маош фонди ўртасидаги фарқни ҳисобга олсак, «Лацио» ва «Наполи» очколари орасида бунчалик катта тафовут борлиги шармандалик», — деди Кассано.
Унинг таъкидлашича, Аллегри мураббий сифатида ўз имкониятларини аллақачон тугатган.
«Аллегрининг вақти ўтганига камида етти-саккиз йил бўлди. У энди ҳеч нарса ютмаяпти. Лекин хавотир олманг: «Наполи»даги муваффақиятсизликдан кейин ҳам кимдир унга яна имконият беради. Мен Фабио Паратичига пул тикаман. Ишонинг, бу албатта содир бўлади. Уларнинг муносабатлари яхши якунланмаган бўлса-да, Паратичи уни «Фиорентина»га олиб келади. Бу икки киши ҳар доим жавобгарликдан қутулиб қолади», — дея қўшимча қилди собиқ футболчи.
Маълумот учун, Аллегри ва Паратичи «Ювентус»да мураббийнинг Турин клубидаги илк фаолияти даврида бирга ишлаган. Ушбу даврда жамоа кетма-кет беш марта Италия чемпионлигини қўлга киритган.
Эслатиб ўтамиз, айни пайтда «Фиорентина»ни Паоло Ваноли бошқармоқда. Жамоа А Серияда ўз ўрнини сақлаб қолиш учун кураш олиб бормоқда.
