Элит Осиё Чемпионлар лигаси 4-турида «Пахтакор» Тошкентда «Ан Наср» билан беллашади. Бугун, ўйин олдидан матбуот анжумани ўтказилди. Унда «шерлар» мураббийи Эмилиан Карас ўз фикрларини билдирди.
- «Эртанги ўйин ҳаммамиз кутган ўйинлардан бири ҳисобланади. Бу баҳсга жиддий тайёргарлик кўрдик. «Ан Наср» Осиёнинг энг кучли жамоаларидан бири ҳисобланади. Биз бўлажак рақибга қарши яхши тайёргарлик кўрдик. Ушбу баҳсда уларга муносиб қаршилик қиламиз. Стадионга келган мухлисларимизни хурсанд қилиш учун майдонга чиқамиз.
- Роналду «Пахтакор»га қарши ўйин учун Тошкентга олиб келинмади. Бу футболчилар хотиржам ўйин кўрсатишига хизмат қилиши мумкинми?
- Таркибда ким бўлишидан қатъий назар, «Ан Наср»да юқори савияли юлдузлар жуда кўп. Айтмоқчиманки, уларда Роналдунинг ўрнини босадиган ўйинчилар топилади. Эхтимол, унинг йўқлиги бизга муамом бўлиши мумкин. Чунки у майдонда бўлганида бутун жамоа унга ўйнайди ва рақибнинг ҳаракатларини ўқиш осонроқ бўлади. Бошқа футболчилар тушганда эса ҳужумни ривожлантириш вариантлари кўпаяди. Эҳтимол, биз учун Роналдусиз «Ан Наср»га қарши ўйнаш қийинроқ бўлиши мумкин.
- «Пахтакор» ҳар уч кунда майдонга тушмоқда, оғир сафарлар бор. Европалик мутахассис сифатида клубдаги тикланиш, физиотерапия ва тиббий штаб ишини қандай баҳолайсиз?
- Тикланиш масаласига келсак, бизда ҳамма шароит бор, аммо энг асосий етишмаётган нарса — бу вақт. Ҳар учинчи кунда майдонга тушяпмиз ва доимий сафарлардамиз. Агар барча ўйинлар уйда бўлганида, парвозларсиз тикланиш анча енгил кечарди. Профессионал клуб сифатида йигитларни жисмоний ва психологик жиҳатдан тиклаш учун қўлимиздан келган барча чораларни кўряпмиз.
- «Ан Наср» таркибида жаҳон футболининг ёрқин юлдузлари тўп тепишади. Гарчи Криштиану Роналду Тошкентга келмаган бўлишига қарамай, жамоада таркибида Садио Мане, Жоао Феликс ва бошқалар бор. Эртанги ўйинда жамоангиз очиқ футбол кўрсатиши мумкинми?
- Биз ўйнаган барча жамоаларда катта маблағ эвазига сотиб олинган сифатли футболчилар бор. Бироқ пул футбол ўйнамайди — майдонга ҳар икки томондан 11 нафардан футболчи тушади. Биз жамоавий кучимизга таянамиз. Рақиб сафида ким майдонга тушишидан қатъи назар, ўз ўйинимизни намойиш этиб, натижага эришишга ҳаракат қиламиз.
- «Эйр Форс»га қарши учрашувдан сўнг майдон ҳолатини танқид қилгандингиз. Лекин жамоангиз ҳали Элит ОЧЛда ғалаба қозонгани йўқ. Бу фақат ташқи омиллар билан боғлиқми ёки жамоа ўйинида ҳам камчиликлар борми?
- Ироқдаги майдон ҳақиқатан ҳам даҳшатли аҳволда эди. Тўғри, бу иккала жамоа учун ҳам бир хил шароит бўлган. Агар биз биринчи бўлиб гол урганимизда, баҳс умуман бошқача кечарди. Биз кўпроқ тўпни ерда сақлаб ўйнайдиган техник жамоамиз, бундай майдонда эса тўғри чизиқли футболга ўтиш талаб этиларди. Масалан, кейинги баҳсда сунъий қопламали майдонда ўйнаган бўлсак-да, у текис эди ва у ерда бемалол футбол ўйнаш мумкин эди. Албатта, мағлубиятлардан биз ҳам хафамиз ва эртанги баҳсда ўзимизни оқлаб, ОЧЛдаги илк ғалабамизни қўлга киритишга бор кучимизни сарфлаймиз», - деди Карас.
Мухлислар бу янгиликни Telegram’да муҳокама қилмоқда
Изоҳлар Telegram’да очилади