Испаниялик физиотерапевт Анхел Вилянуева Франция миллий жамоаси ва Мадриднинг «Реал» клуби ҳужумчиси Килиан Мбаппенинг Туркияга қарши баҳсда олган жароҳати ҳақида фикр билдирди.
Франция 25 сентябр куни Миллатлар лигаси баҳсида Туркияни 1:0 ҳисобида мағлуб этди. Ғалаба голини 54-дақиқада Мбаппе киритди. Бироқ ҳужумчи баҳс давомида жароҳат олиб, унинг ҳолати хавотир уйғотди.
Вилянуеванинг таъкидлашича, тасвирларга қараганда, Мбаппеда оғриқ чап тиззанинг орқа-ён қисмида кузатилган. Мутахассиснинг фикрича, энг эҳтимолий вариант соннинг икки бошли мушаги пастки қисмидаги чўзилиш ёки микрожароҳат бўлиши мумкин. Шунингдек, ташқи мениск шикастланиши ҳам эҳтимол сифатида қайд этилган.
«Реал» ҳужумчисининг тикланиш муддати жароҳат даражасига қараб фарқ қилиши мумкин. Енгил ҳолатда футболчи икки-уч ҳафта, ўртача жароҳатда тўрт-олти ҳафта, оғир ҳолатда эса олти-саккиз ҳафта сафдан чиқиши мумкин.
Вилянуева энг мураккаб ҳолатда, яъни жиддий узилиш юз берган тақдирда, тикланиш 10-12 ҳафтагача чўзилиши мумкинлигини ёзди. Унинг қайд этишича, бундай турдаги жароҳатлардан кейинги тикланиш одатда уч ҳафтадан саккиз ҳафтагача давом этади.
Мутахассис бу фикрларни ижтимоий тармоқдаги саҳифасида билдирди. Якуний ташхис ва Мбаппенинг майдонга қайтиш муддати эса тиббий текширувлардан сўнг аниқланади.
