Ислом Исмоилов: «Ҳозир нимадандир хафа бўлишга ёки аччиқ қилишга вақтимиз йўқ»

ОЧЛ Элит мусобақасининг 2-турида «Нефтчи» сафарда Саудия Арабистонининг «Ан Наср» клубига қарши майдонга тушди. Ўйин эса 3:1 ҳисобида Роналду жамоасининг фойдасига ҳал бўлди.

Беллашув якунига етгач, «Нефтчи» устози Ислом Исмоилов матбуот анжуманида иштирок этди.

- Ўйинни 30-дақиқасигача тартибли футбол ўйнаётгандик. Биргина хато, мувозанатни йўқолиши голга олиб келди ва ундан кейин иккинчи голни ҳам ўтказиб юбордик. Иккинчи таймда ўйинга қайтишга ҳаракат қилдик ва ҳисобни қисқартиришга муваффақ бўлдик. Афсуски, олинган қизил карточка барибир ўйинимизга таъсир қилди. Шунда ҳам жамоа характер кўрсатди. 10 киши бўлиб қолишимизга қарамасдан бир қатор ҳужумлар уюштирдик. Албатта, «Ан Наср»дек юқори даражадаги жамоага қарши 10 киши ўйнаш ёки доимий ҳимояда ўйнаш ҳам қийинчилик туғдиради. Ўйлайманки, максимал даражада ҳаракат қилдик. Футболчиларга миннатдорчилик билдираман. Уларга ҳеч қанақа эътирозим йўқ.

- Қизил карточка олган бўлсанглар ҳам охиригача курашдинглар. Шу боис футболчиларингизга нима демоқчисиз?

- Ўйиндан кейин ўйинчиларга миннатдорчилик билдирдик. Битта ўйин ва бу билан ҳаёт тўхтаб қолмайди. Олдинда бизни жуда кўплаб учрашувлар кутиб турибди. Ҳозир нимадандир хафа бўлишга ёки аччиқ қилишга вақтимиз йўқ. Чунки яна 3 кундан кейин ўйнашимизга тўғри келади. Ҳозир фақат руҳиятни кўтаришимиз ва олдинга қараб интилишимиз керак. Бошқа йўлимиз йўқ.

- «Нефтчи» яна бир гол урганди, аммо офсайд туфайли ҳисобга олинмади. Умуман олганда, ўша ҳисобга олинмаган голга ва қизил карточкага муносабатингиз?

- Тўғриси, ҳали иккала вазиятни ҳам кўриб чиққаним йўқ. Ҳозир бу бўйича фикр билдира олмайман.

- Биринчи турда ғалаба қозонгандинглар. Иккинчи турда эса мағлуб бўлдинглар. Энди жамоада нимани тўғриламоқчисиз? Бундан ташқари, олинган қизил карточка энди жамоага қанчалик таъсир қилади?

- Албатта, ҳар бир учрашувдан кейин тўғрилашимиз керак бўлган жиҳатлар жуда кўп. Ҳар бир ўйин бизга жуда катта дарс беради ва бўлиб ҳам мана шундай юқори клубларга қарши. Масалан, биринчи турда уйимизда рақибга қарши 4-3-3 схемасида ўйнаган бўлсак, «Ан Наср»га қарши 5-4-1 схемасида ҳаракат қилдик. Ҳар бир ўйинга тайёрланган режа ҳамда тактик ишланмалар бор. Хатоларни кўриб чиқамиз ва рақибни хатоларини ўрганиб чиқамиз. Шулардан хулоса қилган ҳолатда ҳар бир баҳсга тайёрланамиз. Айнан қайсидир жиҳатни кўрсата олмайман, чунки тўғрилашимиз керак бўлган ҳолатлар жуда кўп. Масалан, ютган тақдиримизда ҳам хатоларимиз кўп бўлади. Футбол шуниси билан қизиқ. Сиз бир хатони тўғрилайсиз ва кейин бошқа хато юзага чиқади. Кутилмаган ҳолатларга бой ўйин бўлгани билан футбол бошқа спорт турларидан ажралиб туради.

Қизил карточкага келсак, боя айтганимдек, бу вазиятни ҳали кўрганим йўқ. Ҳакамлар бор, ВАР бор, демак қизил карточка бор, шекилли.

- Янги келган футболчилар қанчалик ишончни оқлашяпти?

- Албатта, бу мураббийлар штаби учун ҳам жуда бош оғриқли вазият эди. Олдимизда бошқа йўлимиз йўқ эди. Сабаби, футболчиларни айнан Чемпионлар лигаси учун харид қилганмиз. Уларни ўйнатишга мажбур эдик. Учта янги футболчи асосий таркибда ўйинни бошлади. Мичелга келсак, у узоқ вақт ўйин амалиётига эга бўлмаганди. Сассе ҳам аста-секин жамоага қўшиляпти. Маркус Форссни дебют ўйини эди. Барибир ҳар қандай футболчига таъсир қилади. Сабаби, учала ўйинчи ҳам узоқ вақт ўйин амалиётисиз бўлишган. Лекин олдимизда бошқа йўл, бошқа имкониятимиз йўқ эди. Уларни ўйнатишимиз керак. Айнан ОЧЛ Элит мусобақасида ўйнатиш учун олганмиз.

Биз чемпионат ва Кубок баҳсларида қатнашяпмиз. Учта фронтда ўйнаш осон эмас. Лекин учала ўйинчи ҳам ўзига билдирилган ишончни оқлади. Ёмон ҳаракат қилишмади. Уларга вақт керак. Бир-иккита ўйин билан футболчи бор маҳоратини кўрсата олмайди. Мослашиш учун вақт керак бўлади. Ҳар бир футболчимизга ишонамиз. Ҳамма жамоа учун борини беради», - дея Ислом Исмоиловнинг сўзларини келтиради Tribuna.uz мухбири.