Фред: «Тен Ҳаг Роналду, Каземиро, Рэшфорд билан тортишарди. Аммо тактика борасида энг зўрларидан бири эди»

Фред «Манчестер Юнайтед»да Эрик тен Ҳаг қўл остида ишлаган даврини эслади.

«Тен Ҳаг тактика борасида жуда кучли мутахассис эди, аммо жамоа билан муносабатларда ўзини мутлақо аҳмоқлардек тутарди. У ҳамма билан тортишарди: мен билан, Роналду билан, Каземиро билан, Рэшфорд билан... У мени майдонга туширмасди ва бу баъзида кучли стрессга олиб келарди.

Фақат унинг нидерландиялик футболчилари ўйнарди. Мураббийнинг ўз гуруҳи бор эди. Аммо тактика нуқтаи назаридан у мен ишлаган мураббийлар орасида энг кучлиларидан бири эди.

У жамоа кўп ҳаракат қилиши ва югуришини хоҳларди, аммо Криштиану аллақачон ёш эмасди. У Криштиануни таркибдан чиқариб қўйди ва шундан кейин жамоада келишмовчиликлар бошланди», — деди «Манчестер Юнайтед» собиқ яримҳимоячиси Charla Podcast подкастида.