«Барселона» бош мураббийи Ҳанс-Дитер Флик яримҳимоячи Родри Эрнандеснинг жароҳатидан сўнг ўзига билдирилган танқидларга муносабат билдирди. Мутахассис футболчининг юқори ўйин юкламаси ва унинг жисмоний ҳолати борасида қарор қабул қилишда Родрининг ўзи билан маслаҳатлашганини таъкидлади. Бу ҳақда АS нашри хабар берди.
«Ҳар доим ниманидир яхшироқ қилиш мумкин. Аммо бу ҳолатда футболчи билан гаплашдим ва барчасини муҳокама қилдик. Тажрибали ўйинчи билан суҳбатлашиб, унга саволлар берганингиз ва умумий фикрга келганингиздан кейин, менимча, бошқа қиладиган иш қолмайди. Ҳеч бўлмаганда, мен шундай ҳисоблайман.
Албатта, натижани кўрганингиздан кейин, балки бошқача йўл тутишим керакмиди, деб ўйлайсиз. Аммо буларнинг барчаси энди ўтмишда қолди», — деди Флик.
Маълумот учун, Родри 3 ноябр куни Чемпионлар лигаси доирасида «Астон Вилла»га қарши кечган ва «Барселона»нинг 3:0 ҳисобидаги ғалабаси билан якунланган баҳсда жароҳат олган.
Эслатиб ўтамиз, тиббий текширувлар испаниялик футболчининг ўнг сонидаги икки бошли мушак шикастланганини аниқлади. У тахминан бир ой давомида майдонга туша олмайди.
