ФИФА расмий сайти ЖЧ-2026 якунлари бўйича Осиё вакилларининг иштирокини сарҳисоб қилар экан, Ўзбекистон миллий жамоасининг тарихий мундиал дебютига ҳам алоҳида тўхталиб ўтди.
Қайд этилишича, АҚШ, Канада ва Мекцикада бўлиб ўтган турнирда илк бор иштирок этган Ўзбекистон миллий жамоаси гуруҳ босқичидаги учала баҳсда ҳам мағлубиятга учраб, мусобақани эрта тарк этди. Шунга қарамай, ФИФА жамоа учун ижобий жиҳатлар ҳам бўлганини таъкидлади.
Хусусан, Аббосбек Файзуллаев Колумбияга қарши баҳсда Ўзбекистоннинг Жаҳон чемпионатлари тарихидаги илк голини уриб, мамлакат футболи тарихидан жой олди. Шунингдек, Элдор Шомуродовнинг Конго ДР дарвозасига киритган голи Hyundai томонидан тақдим этилган гуруҳ босқичининг энг чиройли голи совринига лойиқ топилди.
ФИФА мақоласида Фабио Каннаваро бошчилигидаги жамоа мусобақа давомида техникага асосланган ва меҳнаткаш ўйин услубига содиқ қолгани қайд этилган. Турнирнинг юқори суръати футболчиларнинг жисмоний ҳолатига таъсир қилган бўлса-да, бундай тажриба ёш авлод учун муҳим мактаб вазифасини ўтагани таъкидланган.
Хусусан, 18 ёшли Беҳруз Каримов каби футболчилар жаҳон даражасида рақобат қилиш учун нималар талаб этилишини амалда ҳис қилгани, тўрт йилдан сўнг бўлиб ўтадиган навбатдаги мундиалда бу тажриба уларга асқoтиши мумкинлиги қайд этилган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади