Нидерландия миллий жамоаси яримҳимоячиси Жоуей Верманнинг фаолиятини Германия Бундеслигасида давом эттириши расман тасдиқланди. 27 ёшли марказий яримҳимоячи ПСВдан Дортмунднинг «Боруссия»сига ўтди. Бу ҳақда клуб расмий сайти хабар берди.
Верман Дортмунд клуби билан 2031 йил ёзигача мўлжалланган шартнома имзолади. Нидерландиялик футболчи янги жамоасида 25-рақам остида тўп тепади.
«Дортмунднинг «Боруссия»си Европадаги энг йирик клублардан бири ва энди унинг бир қисмига айланганимдан фахрланаман. Бу ерда эканимдан жуда хурсандман ва «Боруссия Д» билан биргаликда муваффақиятларга эришишни интиқлик билан кутяпман», — деди Верман шартнома имзолаганидан сўнг.
Маълумот учун, Верман ўтган мавсум барча турнирларда 41 та баҳсда майдонга тушиб, 8 та гол урди ва 15 та голли узатмани амалга оширди.
Эслатиб ўтамиз, футболчи ПСВ сафида 2022 йилдан буён тўп тепиб келаётганди.
