«Реал» клуби ва Англия миллий жамоаси яримҳимоячиси Жуд Беллингҳэм машҳурликка муносабати ҳамда футболчининг жамият олдидаги масъулияти ҳақида гапирди.
«Менимча, мухлислар баъзан футболчиларни ҳаддан ташқари улуғлаб, уларни бутга айлантиришади. Аммо ҳеч қачон менга бундай муносабатда бўлишларини истамаганман. Аввало, мени инсон сифатида кўришларини хоҳлайман. Дўстларим ва оилам билан вақт ўтказиш, қаҳва ичиш, сайр қилиш менга ёқади.
Одамлар сени доим таниб қолишади, аммо бу маълум маънода хавфсизликни ҳам таъминлайди. Чунки атрофингда оломон тўпланиб, сени безовта қилмайди. Кимдир сен билан суратга тушса, бу ҳақда узоқ вақт гапириб юриши мумкин, ҳолбуки бунинг учун атиги беш сония вақтинг кетади.
Футболга бошқаларга ўрнак бўлиш истаги билан келмаганман. Аммо масъулият ҳақида гапирадиган бўлсак, мен буни айнан шундай тушунаман. Бу менинг ишим, бунинг учун ҳақ оламан. Шу билан бирга, футбол менинг севимли машғулотим ҳам.
Кўплаб инсонлар менга катта маблағ сарфлашади. Мухлислар ўз жамоасига жуда содиқ ва уни қўллаб-қувватлаш учун кўп пул сарфлашади. Шунинг учун истаганингча ўзингни тутиб, ҳар сафар футболка кийганингда шаҳар ёки мамлакат номидан майдонга тушаётганингни унутиб бўлмайди. Чунки сен кимгадир илҳом берасан. Хоҳлайсанми ёки йўқми, кейинги авлод сенга қараб ўрнак олади.
Мен буни имтиёз сифатида қабул қилишни афзал кўраман. Майдондан ташқарида доимо ҳақиқий жентлмен бўлишни исташимни айтиб келганман», — деди Беллингҳэм.
Маълумот учун, Жуд Беллингҳэм «Реал» клуби ва Англия миллий жамоасининг асосий футболчиларидан бири ҳисобланади.
Эслатиб ўтамиз, яримҳимоячи 2023 йил ёзида Дортмунднинг «Боруссия» клубидан Мадрид жамоасига ўтган.
Мухлислар бу янгиликни Telegram’да муҳокама қилмоқда
Изоҳлар Telegram’да очилади