«Бу — ҳурматсизлик». Снейдер Роналду-Жезуш можаросида мураббийни танқид қилди

«Интер» клуби ва Нидерландия миллий жамоасининг собиқ яримҳимоячиси Уэсли Снейдер Португалия сафида Криштиану Роналду билан боғлиқ юзага келган можаро ҳақида ўз фикрларини билдирди.

Эслатиб ўтамиз, ҳужумчи UEFA Миллатлар лигаси доирасидаги Норвегияга (2:1) қарши баҳсда майдонга тушмаганидан сўнг миллий жамоа қароргоҳини ўзбошимчалик билан тарк этганди. Шундан сўнг у баёнот эълон қилиб, Жорже Жезушни унга берилган ваъдаларни бузганликда айблади. Жумладан, мураббий матбуот анжуманида Криштиану билан келишилган гаплардан бошқача фикр билдирганини таъкидлади.

5 ноябр куни эса Роналду миллий жамоадаги фаолиятини якунлаганини маълум қилди.

«Бу — ҳурматсизлик. Мен буни ҳақиқатан ҳам ҳурматсизлик деб ҳисоблайман. Жиддий айтяпман. Мураббий бу ҳақда у билан бошиданоқ гаплашиши керак эди. Масалан: «Қулоқ сол, менинг фикрим шундай», —деб очиқ айтиши лозим эди.

Унинг энг сўнгги ўйинида бундай вазият юзага келишига йўл қўймаслик керак эди! Бунга асло йўл қўйиб бўлмайди! Мураббий сифатида сен ақллироқ иш тутиб, унга шундай дейишинг керак: «Қулоқ сол, кел, ҳозир бир пиёла қаҳва устида суҳбатлашамиз. Мен сени бошқа майдонга туширмайман. Бунга қандай қарайсан?»

Шунда қарор қабул қилиш ҳуқуқи унинг ўзида қоларди, шундай эмасми? Ҳеч бўлмаганда, у билан юзма-юз гаплашган бўлардингиз. Кейин эса барча масалаларни биргаликда ҳал қилишингиз мумкин эди», — деди Снейдер Ziggo Sport телеканали эфирида.