«Бавария» бош мураббийи Венсан Компани Дортмунднинг «Боруссия»сига қарши баҳсга тайёргарлик жараёнида иштирок этмаяпти. Мюнхен клуби мутахассис шифохонада даволангандан кейин тикланаётган даврда уни жамоа ишларига жалб қилмасликка қарор қилган.
Компани ёрдамчиси Аарон Данкс мураббий билан футбол мавзусида суҳбатлашиш ҳам тақиқланганини айтди.
«Биз у билан футбол ҳақида гаплашмаяпмиз. Бу борада бизга аниқ кўрсатма берилган. У тикланиши ва оиласи билан вақт ўтказиши керак. Соғайиб, ишга тўлиқ қайта олиши учун уни жамоа ишларига жалб қилмаяпмиз», — деди Данкс.
Маълумот учун, 23 октябр куни Компани «Бавария»нинг иккинчи жамоаси машғулоти вақтида ҳушини йўқотиб, шифохонага олиб кетилган эди. Кейинчалик 40 ёшли мутахассисда мия пардаларининг таъсирланиши ташхиси қўйилган.
28 октябр куни белгиялик мураббий шифохонадан чиқарилди. Ҳозирда у уйида тикланмоқда. Шифокорлар унга дам олиш ва дори-дармонларни қабул қилишни тавсия этган.
Эслатиб ўтамиз, Компани йўқлигида жамоани унинг ёрдамчиси Аарон Данкс бошқармоқда. У Бундеслиганинг 8-тури доирасида бугун Дортмунднинг «Боруссия»сига қарши кечадиган баҳсда ҳам бош мураббий вазифасини бажаради.
