«Интер» ва Нидерландия миллий жамоасининг собиқ футболчиси Уесли Снейдер 2010 йилда «Олтин тўп» совринини қўлга кирита олмаганини адолатсизлик деб ҳисоблашини айтди.
«Ҳа, мен ўзимга тегишли бўлган «Олтин тўп»дан маҳрум қилиндим. Аммо ростини айтсам, ҳозир одамлар менга: «Уесли, 2010 йилда сендан совринни тортиб олишган», дейишаётганидан хурсандман. Мен «Олтин тўп»ни ноҳақ қўлга киритганим ҳақидаги гаплардан кўра, буни эшитишни афзал биламан», — дея Снейдернинг сўзларини Тhe Touchlinе нашри келтирмоқда.
Маълумот учун, 2010 йилда «Олтин тўп» «Барселона» ва Аргентина миллий жамоаси ҳужумчиси Лионел Мессига насиб этган. Овоз бериш якунларига кўра, Снейдер тўртинчи ўринни эгаллаган. Унинг олдидан Андрес Инеста ва Хави жой олган.
Эслатиб ўтамиз, Снейдер 2010 йилда «Интер» сафида Чемпионлар лигаси, Италия чемпионати ва Италия кубогида ғолиб чиққан. Шунингдек, Нидерландия миллий жамоаси билан жаҳон чемпионати финалига қадар етиб борган.
