«Арсенал» ва «Ливерпул» «Брентфорд»нинг қанот ҳужумчиси Кевин Шадени ўз сафига қўшиб олишга қизиқмоқда. Бу ҳақда Sky Sports хабар берди.
Манба маълумотига кўра, «Брентфорд» 24 ёшли вингер билан ҳамкорликни давом эттирмоқчи ва футболчи билан узоқ муддатли янги шартнома бўйича дастлабки музокараларни ўтказган.
Қайд этилишича, ёзги трансфер ойнаси якунига яқин «Арсенал» ва «Ливерпул» германиялик футболчига энг катта қизиқишни билдирган клублар бўлган.
Шаде ушбу мавсумда барча турнирларда 6 та баҳсда майдонга тушиб, 3 та гол урди. Унинг «Брентфорд» билан амалдаги шартномаси 2028 йил ёзигача мўлжалланган.
Маълумот учун, Transfermarkt 24 ёшли футболчининг бозор қийматини 35 миллион еврога баҳоламоқда.
