«Арсенал» Лондонда Чемпионшипга равона бўлган жамоага қарши ўйнайди

Бугун, 18 май куни «Арсенал» Лондонда «Бёрнли»га қарши Англия Премер-лигаси 37-турида ўйнайди.

Ҳозирда «тўпчилар» лигада 79 очко билан пешқадамлик қилмоқда. «Сити» эса 77 очко билан иккинчи ўринда бормоқда. Артета дружинасининг бўлажак рақиби ҳақида гап кетганда, улар аллақачон Чемпионшипга тушиб кетиб бўлган. Лондондаги беллашувга «Бёрнли» шунчаки ташриф буюради ва ҳеч қандай босимларсиз ҳаракат қилади.

Жамоаларнинг сўнгги 5 ўйини:
01.11.2025. «Бёрнли» — «Арсенал» 0:2
17.02.2024. «Бёрнли» — «Арсенал» 0:5
11.11.2023. «Арсенал» — «Бёрнли» 3:1
23.01.2022. «Арсенал» — «Бёрнли» 0:0
18.09.2021. «Бёрнли» — «Арсенал» 0:1

Кўриниб турибдики, АПЛ доирасидаги сўнгги 5 та беллашувнинг 3 тасида «Арсенал» ғалаба қозонган. Бир ўйинда томонлар муроса кўчасини танлашган. Агар бугунги баҳсда «тўпчилар» очко йўқотмаса, сўнгги тур олдидан яхши имкониятга эга бўлади. Қолаверса, «Манчестер Сити» сафарда «Борнмут»ни енга олмаса, чемпионликни муддатидан олдин расмийлаштириши ҳам ҳеч гап эмас.

Чунки «олчалар» ҳам Чемпионлар лигаси йўлланмаси учун курашмоқда. АПЛ доирасида 16 та ўйиндан бери мағлубиятга учрагани йўқ. «Борнмут» уйдаги беллашувда «шаҳарликлар»га яхшигина қаршилик кўрсатишини тахмин қилиш мумкин.

Тахминий таркиблар:
Арсенал — Райя, Москера, Салиба, Габриэл, Калафиори, Райс, Люис-Cкелли, Сака, Троссар, Эдегор, Гокереш.
Бёрнли — Вайс, Уокер, Туанзебе, Эстев, Пирес, Межбри, Флорентину, Угочукву, Чауна, Флемминг, Энтони.

Таркибларга келсак, «Арсенал»да катта йўқотишлар йўқ. Артета бор имкониятларидан фойдаланиши мумкин. «Бёрнли» эса эҳтимол, кам ўйин амалиётига эга бўлаётган футболчиларни майдонга тушириш эҳтимоли ҳам йўқ эмас. Жамоани ҳозирда Майк Жексон вақтинчалик бошқармоқда. У қандай таркибдан фойдаланиши ҳам олдиндан тахмин қилиш қийин.

Эслатиб ўтамиз, «Арсенал» - «Бёрнли» беллашув бугун, 18 май куни Тошкент вақти билан соат 23:59 да бошланади.