Саудия Арабистонининг «Ал Аҳли» клуби Лиссабоннинг «Спортинг» жамоаси вингери Франциску Тринкаони трансфер қилиш бўйича музокараларни давом эттирмоқда.
Инсайдер Фабрицио Романонинг хабарига кўра, томонлар ўртасидаги музокаралар анча илгарилаган. Футболчининг ўзи ҳам Саудия клубига кўчиб ўтишга қарши эмас. Трансфер қиймати тахминан 50 миллион еврони ташкил қилиши мумкин.
Манбага кўра, Тринкао яқинда клубни тарк этган Жазоир миллий жамоаси афсонаси Риёд Маҳрезнинг ўрнини эгаллаши кутилмоқда.
Эслатиб ўтамиз, Маҳрез бир неча кун аввал «Ал Аҳли» билан хайрлашганини расман эълон қилган эди.
Маълумот учун, 25 ёшли Франциску Тринкао Португалия миллий жамоаси сафида ҳам мунтазам майдонга тушмоқда ва сўнгги мавсум «Спортинг»нинг етакчи футболчиларидан бири бўлди.
