Vinisius 4 o‘yinga chetlatildi

«Real» hujumchisi Vinisius Junior La Liga doirasida 4 o‘yinga chetlatildi.

Ispaniya Qirollik futbol federatsiyasi (RFEF) intizom qo‘mitasi tomonidan uzoq muddatli diskvalifikatsiyaning sabablari ma’lum qilindi. Intizom organining qaroriga ko‘ra, futbolchining jazosi ikki alohida holat bo‘yicha belgilangan:

— 2 ta o‘yinga diskvalifikatsiya futbolchiga to‘p uchun kurashdan tashqari holatda «zo‘ravonlik harakatlari» sodir etgani uchun 130.2-modda asosida berilgan. Gap braziliyalik futbolchining «Vilyarreal» yarimhimoyachisi Neytan Salibaning sochidan ushlab olgan epizodi haqida ketmoqda.

— Yana 2 ta o‘yinga diskvalifikatsiya esa qizil kartochka ko‘rsatilganidan keyin bosh hakamlar brigadasiga nisbatan tajovuzkor e’tirozlar bildirgani va haqoratomuz gaplar aytgani uchun 127-modda asosida tayinlangan.

Shunday qilib, Vinisius Ispaniya La Ligasida «Sevilya», «Barselona», «Rasing» va «Valensiya» jamoalariga qarshi o‘yinlarda maydonga tushmaydi.