Angliya milliy jamoasi bosh murabbiyi Tomas Tuxel Millatlar ligasidagi navbatdagi uchrashuvlar va jamoa oldiga qo‘yilgan maqsadlar haqida fikr bildirdi.
Eslatib o‘tamiz, 12 noyabr kuni angliyaliklar Xorvatiyaga qarshi maydonga tushsa, 15 noyabr kuni Ispaniya bilan kuch sinashadi.
«Mening maqsadim — guruhda birinchi o‘rinni egallash. Jamoamiz ham aynan shu natija uchun kurashmasa, hayron qolgan bo‘lardim. Final bosqichini Ispaniyada o‘tkazishni istaymiz. Bizga muhim natija uchun kurash olib boriladigan, keskin va mas’uliyatli uchrashuvlar kerak. Millatlar ligasidan aynan shu maqsadda foydalanmoqchimiz — Yevropa chempionatiga imkon qadar yaxshi tayyorgarlik ko‘rish uchun.
Xorvatiyaga qarshi bahs juda muhim. Ayniqsa, ushbu raqib bilan avvalgi uchrashuvimiz natijasini hisobga olsak. O‘shandagi natijaga munosib erishgan edik, ammo qanday saviyada o‘ynaganimiz va qancha kuch sarflaganimizni ham yodga olishimiz kerak. Hozir yana shunday yuqori darajadagi o‘yin namoyish etishimiz zarur.
Xorvatiya Ispaniyaga qarshi bahsda o‘zini juda yaxshi ko‘rsatdi. Ular g‘alabaga juda yaqin keldi. Hozir esa butun e’tiborimiz Xorvatiyaga qarshi uchrashuvga qaratilgan va biz unga tayyorgarlik ko‘ryapmiz.
Qisqa vaqt ichida juda kuchli ikki milliy jamoaga qarshi o‘ynashimiz kerak. Tayyorgarlik uchun atigi ikki kun — seshanba va chorshanba kunlari ixtiyorimizda bo‘ladi. Ushbu vaqt davomida maydonda mashg‘ulotlar o‘tkazib, o‘yin uslubimiz va taktik sxemalarimizni qayta tiklashga harakat qilamiz», — deya Tuxelning so‘zlarini keltirmoqda Sky Sports nashri.
Muxlislar bu yangilikni Telegram’da muhokama qilmoqda
Izohlar Telegram’da ochiladi